Princi William zbuloi se kishte dashur që djali i tij, princi George, të përjetonte një “natë të madhe europiane në transfertë”, teksa të dy ndoqën ndeshjen çerekfinale të Ligës së Kampioneve mes Aston Villa dhe PSG në Paris.
Dyshja përjetoi një mori emocionesh gjatë pjesës së parë në stadiumin Parc des Princes.
Ata shpërthyen në festë kur Morgan Rogers kaloi Aston Villa-n në avantazh, por gëzimi i tyre u zbeh shpejt pasi PSG barazoi me një gol të mrekullueshëm nga Desire Doue. Në fund, mbrëmja përfundoi me zhgënjim për Aston Villa-n, që u mund 3-1 në kryeqytetin francez.
Princi i Uellsit u bashkua me analistët e TNT Sports, Rio Ferdinand dhe Ally McCoist, përpara se të merrte vendin e tij në stadium për ndeshjen e parë çerekfinale.
Ai është parë shpesh gjatë këtij sezoni duke ndjekur nga afër Aston Villa-n në ecurinë e tyre në Ligën e Kampioneve dhe u ftua në këtë përballje nga presidenti i PSG-së, Nasser Al-Khelaifi. I pyetur nga Ferdinand nëse ky ishte një “udhëtim djemsh”, William u përgjigj me humor se ishte në “sjelljen më të mirë” në Paris.
“Nuk e di sa tifozë të Villa-s do të ketë, por do t’i bëjnë vetes vend,” tha ai.
“Kam marrë me vete edhe djalin, kështu që jam në sjellje të mirë. Kanë kaluar 43 vjet që kur ka ndodhur diçka e tillë dhe dua që George të përjetojë një natë të madhe në një kompeticion të rëndësishëm – këto kujtime janë shumë të rëndësishme për t’u krijuar, dhe ta marrësh me vete jashtë vendit është diçka me vlerë.”
“Jam i hapur për kë të mbështesin fëmijët e mi, edhe pse unë jam i njëanshëm. Ata shkojnë në ndeshje me Aston Villa-n, kështu që me gjasë do të jenë me Villa-n. Dy të tjerët i lashë në shtëpi, ndoshta duke e parë ndeshjen në TV. Do të shohim kë do të mbështesin.”
Princi William, i cili është gjithashtu Patron i Federatës Angleze të Futbollit (FA), kishte parashikuar një fitore 2-1 për skuadrën e Unai Emery, duke shpresuar se do t’u ndihmonte për të siguruar një vend në gjysmëfinale.
Megjithatë, ai pranoi se ishte “mjaft i trembur” përballë kampionëve francezë, të cilët kanë shkëlqyer këtë sezon në Ligën e Kampioneve.
“Ka kaluar shumë kohë që nga hera e fundit që ndodhi diçka e tillë, kështu që është një ndeshje e madhe, por jam i sigurt dhe i emocionuar për mundësinë,” tha ai për TNT Sports. “Jam veshur me të gjitha rrobat dhe sende të veçanta, kam bërë edhe rutinën time.”
Princi William u pa edhe në tunelin e stadiumit përpara fillimit të ndeshjes dhe përqafoi sulmuesin e Aston Villa dhe Anglisë, Marcus Rashford, ndërsa lojtarët po ktheheshin në dhomat e zhveshjes pas nxehjes.
