Rojet bregdetare të Kinës dhe Japonisë kanë dhënë versione të ndryshme të një konfrontimi që ndodhi pranë një grupi ishujsh gjeopolitikisht të ndjeshëm në Detin e Kinës Lindore.
Roja Bregdetare e Kinës tha të martën se një anije peshkimi japoneze kishte hyrë ilegalisht në ujërat e Ishujve Senkaku – të cilat Pekini i quan Ishujt Diaoyu dhe i pretendon si territor kinez, pavarësisht se administrohen nga Japonia.
Ndërkohë, Roja Bregdetare e Japonisë tha se ka kapur dhe dëbuar dy anije të Rojës Bregdetare Kineze ndërsa ato i afroheshin anijes së peshkimit.
Ky konfrontim vjen ndërsa lidhjet diplomatike midis dy kombeve përkeqësohen, pasi kryeministri i Japonisë bëri komente kontraverse në lidhje me Tajvanin muajin e kaluar.
Ndërsa iu përgjigj një pyetjeje në parlament muajin e kaluar, kryeministri japonez Sanae Takaichi, i njohur si një kritik i zëshëm i Kinës dhe aktiviteteve të saj në rajon, sugjeroi që Tokio mund të ndërmarrë veprime ushtarake nëse Pekini sulmon Tajvanin.
Pekini e sheh Tajvanin e vetëqeverisur si pjesë të territorit të tij dhe nuk e ka përjashtuar përdorimin e forcës për t’u “ribashkuar” me të.
Që atëherë, të dyja palët janë angazhuar në një retorikë gjithnjë e më armiqësore ndaj njëra-tjetrës, me përçarjen në zgjerim që ndikon në jetën e përditshme të qytetarëve në të dy vendet.
Tajvani ndodhet rreth 160 km në jugperëndim të Ishujve Senkaku.
Zëdhënësi i Rojës Bregdetare të Kinës (CCG), Liu Dejun, tha se anijet kineze të martën iu afruan dhe paralajmëruan një anije peshkimi japoneze që kishte “hyrë ilegalisht në ujërat territoriale të Diaoyu Dao të Kinës”, sipas një raporti të medias shtetërore.
Liu shtoi se CCG mori “masat e nevojshme të zbatimit të ligjit”, duke pretenduar se ishujt ishin territor kinez dhe duke i kërkuar Japonisë të “ndalojë menjëherë të gjitha aktet e shkeljes dhe provokimit në këto ujëra”.
Roja Bregdetare e Japonisë (JCG) ofroi një version paksa të ndryshëm, duke thënë se iu afruan anijeve kineze menjëherë pasi u panë duke hyrë në ujërat japoneze në orët e para të së martës dhe lëshoi një kërkesë që ato të largoheshin nga ujërat.
Anija patrulluese e JCG siguroi sigurinë e anijes së peshkimit derisa CCG u largua nga territori disa orë më vonë, tha ajo.
Ndërsa Japonia dhe Kina bënë një marrëveshje në parim në vitin 2008 për të shfrytëzuar së bashku burimet në Detin e Kinës Lindore, rrugën ujore që ndan të dy vendet, tensionet janë përshkallëzuar gjatë dekadës e gjysmë të fundit.
Ishujt Senkaku/Diaoyu, të cilët janë të pabanuar, përfaqësojnë një pikë të nxehtë në këto tensione.
Kina ka dërguar një numër gjithnjë e në rritje anijesh drejt ishujve, në atë që duket të jetë një përpjekje për të testuar vendosmërinë e Japonisë për t’i mbrojtur ato.
Vitin e kaluar, numri i ditëve që anijet qeveritare kineze u panë në territor arriti një rekord për të tretin vit radhazi. Kishte gjithashtu një numër rekord anijesh të CCG që vepronin në ujëra.
Para ngjarjeve të mëngjesit të së martës, CCG hyri për herë të fundit në ujërat përreth Ishujve Senkaku/Diaoyu më 16 nëntor, duke kryer atë që e përshkroi në atë kohë si “një operacion patrullimi i ligjshëm i kryer nga roja bregdetare e Kinës për të mbrojtur të drejtat dhe interesat e saj”.
