Një turist arrogant u bë pjesë e një skene të dhunshme dhe poshtëruese në Pattaya të Tajlandës, pasi sfidoi një roje sigurie për një duel fizik jashtë një bari gjatë festimeve të Vitit të Ri Tajlandez, vetëm për t’u rrëzuar në tokë me një goditje të vetme, siç tregon një video që është bërë virale.
Sipas mediave vendase, turisti i dehur kishte ngacmuar një punonjëse të lokalit dhe kishte derdhur birrë mbi kokën e rojës, duke u përjashtuar menjëherë nga lokali. Por në vend që të largohej, ai hoqi bluzën dhe nisi të provokonte një tjetër roje, duke bërë që të mblidhej një turmë spektatorësh.
Në video, ai duket duke sfiduar rojen, e cila më pas zbulua se ishte i trajnuar në boks tajlandez. Në momentin që roja vendosi të pranonte sfidën, mjaftoi një goditje për ta rrëzuar turistin në tokë, përpara se të shtyhej dhe goditej sërish ndërsa përpiqej të ngrihej. Disa punonjëse të barit dhe kalimtarë u përfshinë gjithashtu në përleshje.
Dëshmitarët, përfshirë një turist të quajtur Nick Rizal, thanë se sjellja e të huajit kishte qenë provokuese dhe ofenduese. “E kishte kërkuar vetë”, tha ai. “Rojet ishin të përmbajtur në fillim, por në atë pikë, për ta nuk ishte më çështje pune, por nderi personal.”
Policia lokale thirri për marrje në pyetje rojet, menaxherin e barit dhe punonjësen e ngacmuar. Rojet, të identifikuar si Non, 36 vjeç, dhe Nik, 37, pranuan përfshirjen dhe shprehën keqardhje që nuk treguan më shumë përmbajtje.
Ngjarja rikthen vëmendjen mbi reputacionin e errët të Pattayas, e cila shpesh përshkruhet si “Qyteti i Mëkatit”. Autoritetet tajlandeze janë përpjekur kohët e fundit ta ribrandojnë qytetin si një destinacion më familjar, duke shtuar masa sigurie, ndriçim, kamera dhe festivale plazhi për të tërhequr turistë më cilësorë. Por incidente të tilla tregojnë se rruga drejt këtij transformimi nuk është aspak e lehtë.
