Një çift britanik është dënuar me dhjetë vjet burg në Iran nën akuzën e “spiunazhit”, në një vendim që është dënuar ashpër nga autoritetet britanike si “krejtësisht i pajustifikuar”. Lindsay dhe Craig Forman, me origjinë nga East Sussex në Mbretërinë e Bashkuar, u arrestuan në janar 2025 ndërsa udhëtonin me motoçikletë në Iran. Ata aktualisht po mbahen në Evin Prison, në Tehran, dhe i mohojnë kategorikisht akuzat.
Sekretarja e Brendshme britanike, Yvette Cooper, e cilësoi vendimin si “absolutisht tronditës dhe plotësisht të pajustifikuar”. Ajo tha se qeveria do të vazhdojë të angazhohet me autoritetet iraniane derisa çifti të kthehet i sigurt në Mbretërinë e Bashkuar, duke theksuar se prioritet mbetet mirëqenia e tyre dhe ofrimi i ndihmës konsullore. Djali i Lindsay-t, Joe Bennett, tha për ITV News se familja u njoftua për dënimin javën e kaluar dhe se ata janë “thellësisht të shqetësuar” për shëndetin e prindërve dhe mungesën e transparencës në procesin gjyqësor. Sipas tij, gjyqi zgjati vetëm tre orë dhe çiftit nuk iu lejua të paraqiste mbrojtje.
“Nuk kemi parë prova që mbështesin akuzën e spiunazhit. Shpresojmë që qeveria britanike të përdorë çdo mjet për të siguruar lirimin e tyre”, tha ai. Në janar, Bennett doli publikisht së bashku me ish-të burgosurin Anousheh Assouri dhe aktivistin Richard Ratcliffe, bashkëshorti i Nazanin Zaghari-Ratcliffe. Ratcliffe kishte udhëhequr një fushatë të gjatë për lirimin e gruas së tij, përfshirë greva urie dhe dorëzimin e një peticioni me 70,000 nënshkrime në 10 Downing Street.
Para shpalljes së dënimit, Craig Forman kishte dërguar një mesazh të shkurtër përmes medias: “Një fjalë: ndihmë. Kaq është”, deklaroi ai për ITV News. Ai përshkroi kushtet e paraburgimit si të rënda, duke përmendur një qeli me tavan tetë metra të lartë, një vrimë në dysheme dhe një lavaman, si dhe 57 ditë izolim që, sipas tij, e kanë shkatërruar emocionalisht dhe fizikisht.
Lindsay Forman, duke folur për BBC përpara shpalljes së vendimit, tha se kishte udhëtuar në Iran si pjesë e një “iniciative globale të fokusuar në të mirën” dhe se besimi i saj në unitetin mes njerëzve nuk ishte lëkundur. Çifti pritet të paraqitet sërish në gjykatë në Teheran në ditët në vijim. Craig Forman tha se takimet e rralla mujore me bashkëshorten janë burimi i vetëm i forcës për të përballuar situatën: “Për mua dhe Lindsay-n, të shohim njëri-tjetrin është e vetmja gjë që na mban gjallë në këtë moment.”
