Çfarë ndodh pas vdekjes? Disa e quajnë “misterin e madh”, por njerëz që kanë përjetuar ndalimin e zemrës e janë rikthyer në jetë po ndajnë rrëfime tronditëse për çfarë panë në anën tjetër.

Disa e përshkruajnë si një gjumë paqësor. Britaniku Matthew Allick, që u shpall klinikisht i vdekur për disa minuta pas një embolie pulmonare, thotë se gjithçka që ndjeu ishte “një gjumë i qetë, pa dhimbje”.

Të tjerë kanë përjetime më të ndërlikuara. Amerikania Brianna Lafferty thotë se pa një tunel të ndritshëm plot me numra “1 dhe 0”, të cilin e interpreton si strukturën e fshehtë matematikore të universit.

Një nënë nga Kolorado, Nicole Meeuws, rrëfen se u “tërhoq” në një tunel drite blu dhe u takua me qenie me lëkurë blu dhe fytyra njerëzore, të cilët sipas saj i dhanë mesazhin se “jeta e vërtetë fillon vetëm pas vdekjes”.

Ndërsa Charlotte Holmes, një gjyshe nga Kansas, thotë se vizitoi parajsën dhe më pas u dërgua në buzë të ferrit për të parë kontrastin mes bukurisë hyjnore dhe dhimbjes së pafundme.

Shkencëtarët e shpjegojnë këtë fenomen si halucinacione të shkaktuara nga mungesa e oksigjenit dhe çrregullimet neurologjike. Por për ata që e kanë përjetuar, kujtimet janë më shumë sesa reaksione biologjike – janë prova se ekziston diçka përtej.

Nga qetësia absolute, tek tunele numerike, qenie qiellore dhe pamje të ferrit – dëshmitë e të mbijetuarve formojnë një mozaik të pasigurt, por magjepsës mbi misterin e jetës pas vdekjes.