Këngëtari britanik, Conor Maynard, ka zbuluar se është fejuar me të dashurën e tij, Kitty Bertrand.
Lajmin e gëzueshëm 32-vjeçari e ndau të shtunën në rrjetet sociale, ku publikoi një fotografi të çiftit duke u puthur dhe shkroi: “Gëzuar ditëlindjen të fejuarës sime. Jam gati të jem përgjithmonë me ty”. Në imazhet e ndara, Kitty shihet e lumtur teksa tregon unazën e saj me gurë.
Ky hap i rëndësishëm në jetën private të Conorit vjen pas disa momenteve të tjera të veçanta që çifti ka ndarë me ndjekësit muajt e fundit.
Në mars ata zbuluan se kishin blerë shtëpinë e parë së bashku, ndërsa në qershor njoftuan se kishin adoptuar një qenush Bernedoodle të quajtur Bernard, i cili shpejt u bë pjesë e pandashme e familjes së tyre.
Megjithatë, lajmi i fejesës vjen edhe pas një periudhe të trazuar për Conorin, i cili ishte përfshirë në një dramë publike me Charlotte Chilton, konkurrente e “The Traitors”.
Charlotte kishte pretenduar se Conori ishte babai i vajzës së saj, Penelope, pas një lidhjeje të shkurtë.
Pas dy testeve të ADN-së, të dyja të kryera në qendra të akredituara nga Ministria e Drejtësisë, u vërtetua përfundimisht se Conor nuk ishte babai biologjik.
Këngëtari e përshkroi këtë periudhë si shumë të vështirë për të dhe familjen e tij, por shtoi se ndihej i lehtësuar që gjithçka më në fund mori fund.
Tani, me fejesën e sapo shpallur, Conor duket i gatshëm të lërë pas dramat e së shkuarës dhe të nisë një kapitull të ri pranë Kitty Bertrand, të cilën e quan jo vetëm të dashurën e jetës, por edhe njeriun me të cilin dëshiron të kalojë të ardhmen.
