Presidenti i SHBA-së, Donald Trump, dhe Zonja e Parë, Melania Trump, mbërritën sot në Kështjellën Windsor në kuadër të një vizite zyrtare dyditore në Mbretërinë e Bashkuar.
Helikopteri presidencial Marine One u ul rreth orës 13:00, ndërsa pritja e tyre ishte madhështore dhe e mbushur me simbolikë mbretërore.
Çifti Trump u prit fillimisht në Kopshtin e Muruar të Kështjellës Windsor nga Princi dhe Princesha e Uellsit, William dhe Kate, të cilët i shoqëruan në Victoria House për takimin zyrtar me Mbretin Charles III dhe Mbretëreshën Camilla.
Pavarësisht se më herët ishte raportuar se Camilla nuk ndihej mirë, burime zyrtare mbretërore konfirmuan pjesëmarrjen e saj në të gjitha ngjarjet e vizitës.
Ceremonia u shoqërua nga Banda e Kalorësisë së Familjes Mbretërore, ndërsa në sfond u interpretuan himnet kombëtare të SHBA-së dhe Mbretërisë së Bashkuar.
Pas takimit, Mbreti Charles dhe Presidenti Trump ndërmorën një tur simbolik me karrocë në oborret e Kështjellës Windsor, në një atmosferë formale dhe festive.
Më pas, çifti Trump zhvilloi një vizitë private në varrin e Mbretëreshës Elizabeth II, ku vendosën një kurorë me lule në shenjë respekti.
Vizita do të kulmojë me një darkë shtetërore të shtruar nga Mbreti Charles III në nder të Donald dhe Melania Trump.
Gjatë eventit, Mbreti do të mbajë një fjalim zyrtar, përpara se të vazhdohet me pritjen festive dhe protokollare në ambientet e kështjellës.
