Supermodeli Elton Ilirjani vazhdon të jetë i preferuari i stilistit vizionar Malan Breton, me të cilin ka realizuar bashkëpunime të suksesshme ndër vite. Këtë herë, ai ndezi pistën e Javës së Modës në New York me një prezantim që tejkaloi kufijtë e modës, duke u shndërruar në një teatër me katër akte – “The Age of the Machine, The Heart of Humanity” – ku teknologjia dhe zemra njerëzore takohen në kontrast dhe harmoni. Nga strukturat e sofistikuara te teksturat e pasura të epokës Gilded Age, çdo detaj ishte një tregim më vete.

Në këtë narrativë të fuqishme, Ilirjani u shfaq si figurë kyçe, duke mbyllur shfaqjen me një prani që sfidoi normat dhe tejkaloi rolin tradicional të modelit. Ai mishëroi idenë e transformimit dhe guximin për të jetuar lirinë pa kufij, duke i dhënë koleksionit një energji unike të diversitetit dhe përfshirjes. Çastet e tij në pistë nuk ishin thjesht modë, por një deklaratë – një kujtesë se përfshirja dhe individualiteti janë po aq të rëndësishme sa couture-i dhe mjeshtëria.

Shfaqja mbante gjithashtu një mision human, duke ngritur ndërgjegjësimin për kujdesin ndaj të prekurve nga Alzheimeri përmes modës, dhe duke nënvizuar se arti dhe moda mund të shërbejnë si ura për mesazhe që prekin shoqërinë.

Malan Breton dhe Elton Ilirjani krijuan një moment që tashmë renditet ndër kapitujt më të paharrueshëm të Javës së Modës në New York: një përplasje mes së ardhmes dhe njerëzores, ku moda nuk vishet vetëm, por ndjehet.

Portale prestigjioze si Forbes, Elle, Harper’s Bazaar, Madame Figaro, Marie Claire, Fashion Magazine dhe të tjera i kanë kushtuar hapësirë të veçantë kësaj sfilate. Dhe ndonëse Java e Modës në New York është ende në zhvillim, është e qartë se prania e Ilirjanit ka lënë tashmë një gjurmë të fortë.