Testamenti i stilistit të njohur Giorgio Armani, i cili ndërroi jetë javën e kaluar në moshën 91-vjeçare, përmend si blerësit e preferuar të perandorisë së tij të modës grupet LVMH, Luxottica dhe L’Oréal, duke hapur garën për marrjen e kontrollit mbi markën më të madhe private të luksit në botë.
Armani i ka dhënë urdhër trashëgimtarëve, përfshirë “krahun e tij të djathtë” Leo Dell’Orco dhe anëtarë të familjes, që të shesin një pjesë fillestare prej 15 për qind të aksioneve të grupit italian tek një prej këtyre tre rivalëve më të mëdhenj.
Testamenti, i shkruar me dorë në prill dhe bërë publik të premten, specifikon gjithashtu që brenda pesë vjetëve nga vdekja e stilistit të shitet një tjetër pjesë prej 30 deri në 54.9 për qind tek i njëjti blerës.
Nëse shitja dështon, trashëgimtarët, të cilët do të marrin kontrollin e kompanisë përmes Fondacionit Giorgio Armani duhet të konsiderojnë listimin në bursë, thuhet në testament.
Armani ishte aksioneri i vetëm i grupit që përfshin markat Emporio Armani, Armani Exchange dhe Armani Privé, si dhe hotele, restorante dhe një linjë fitimprurëse kozmetike, të cilën e drejtoi deri në fund të jetës. L’Oréal dhe Armani kanë një marrëveshje licencimi që nga viti 1988 për shitjen e produkteve, përfshirë parfumet e njohura si Acqua di Giò. Ndërkohë, gjiganti i syzeve EssilorLuxottica prodhon dhe shpërndan linjën e syzeve Armani.
Në testament, Armani tha se edhe partnerët e tjerë tregtarë ekzistues mund të konsiderohen si blerës potencialë. Në një intervistë për Financial Times në vitin 2023, stilisti u shpreh se dëshironte të shmangte blerjen nga një konglomerat francez i luksit, pasi nuk donte që marka të “dominohej nga një nga këto struktura gjigante që u mungon personaliteti”.
Megjithatë, ai ishte i vetëdijshëm se kompania ishte identifikuar ngushtë me emrin e tij dhe, ndonëse ishte përgjegjës për të siguruar që “kompania të mbajë një gjurmë që i ngjan z. Armani”, gjërat do të ndryshonin pas vdekjes së tij.
Dy nga tre grupet e përmendura në testament janë franceze. EssilorLuxottica, themeluar nga miliarderi italian Leonardo Del Vecchio që ka ndërruar jetë, është gjithashtu e listuar në bursën e Parisit. Analistët dhe miqtë e stilistit kanë vërejtur prej kohësh se, megjithëse fondacioni u krijua në vitin 2016 për të parandaluar ndarjen ose shitjen pas vdekjes së Armanit, grupi nuk pritej të mbetej i pavarur përgjithmonë.
Ndërsa Armani arriti të ruajë kontrollin mbi kompaninë deri në fund, të ardhurat e grupit patën vështirësi në rritje, duke mbetur të qëndrueshme në rreth 2.4 miliardë euro vitin e kaluar, për shkak të largimit të konsumatorëve më të rinj nga veshjet klasike të markës dhe ngadalësimit të industrisë së luksit. Leo Dell’Orco, partneri i Armanit dhe drejtuesi i divizionit të stilit për meshkuj, do të luajë një rol kyç në vendimet për të ardhmen e grupit. Testamentit i jep atij 30 për qind të aksioneve dhe 40 për qind të të drejtave të votës.
Armani nuk pati fëmijë, ndërsa trashëgimtarë të tjerë janë mbesat Roberta dhe Silvana Armani, të cilat punojnë në kompani, si dhe nipi Andrea Camerana, anëtar i bordit, dhe motra Rosanna.
