Një 50-vjeçar shqiptar është arrestuar nga shërbimet e Policisë Kufitare në Portin e Sarandës, pasi rezultonte në kërkim ndërkombëtar nga autoritetet italiane. Ai ishte dënuar me 18 vite burg, për përfshirje në një organizatë kriminale që trafikonte lëndë narkotike.

Sipas njoftimit zyrtar, i arrestuari është shtetasi Ermal Kostare, i njohur edhe me emrin Denis Rama, banues në Tiranë dhe rezident në Mbretërinë e Bashkuar.

Ai tentoi të largohej nga Shqipëria përmes pikës kufitare detare në Sarandë, duke përdorur pasaportë britanike me gjeneralitete të rreme, me qëllim shmangien e identifikimit. Por, falë verifikimeve të thelluara, përfshirë kontrollin biometrik të gjurmëve të gishtave, dhe bashkëpunimit të ngushtë me Interpol Tiranën, u bë e mundur identifikimi i tij i saktë.

Policia Kufitare e PKK Port Sarandë ngriti menjëherë dyshime gjatë kontrollit të dokumenteve dhe e kaloi 50-vjeçarin për verifikime të mëtejshme në vijën e dytë. Krahasimi i të dhënave me ato të dërguara nga Interpol Tirana, konfirmoi se ai ishte person në kërkim ndërkombëtar, i dënuar në Itali për veprat penale “Organizatë kriminale” dhe “Trafikimi i narkotikëve”.

Aktualisht, ndaj tij është vendosur arrest provizor me qëllim ekstradimi, ndërsa Interpol Tirana, në bashkëpunim me Interpol Romën, po ndjek procedurat për dorëzimin e tij tek autoritetet italiane.