Presidenti rus Vladimir Putin deklaroi të mërkurën se konflikti në Ukrainë mund të marrë fund përmes një marrëveshjeje nëse “mbizotëron arsyeja e shëndoshë”, por paralajmëroi se në të kundërtën do të zgjidhet ushtarakisht.
Duke folur në një konferencë për shtyp pas vizitës së tij në Kinë për Samitin e SCO-së në Tianjin dhe paradën ushtarake me rastin e 80-vjetorit të përfundimit të Luftës së Dytë Botërore, Putin tha se trupat ruse po “përparojnë në të gjitha frontet” dhe se Ukraina nuk ka kapacitete për një ofensivë të madhe.
Ai shtoi se është i hapur për t’u takuar me presidentin ukrainas Volodymyr Zelensky, por vetëm në Moskë dhe nëse një takim i tillë do të sillte rezultate konkrete. “Nuk e kam përjashtuar kurrë një takim me Zelenskyn, por a ka kuptim? Le të shohim”, tha Putin, duke kërkuar që Ukraina të heqë ligjin ushtarak, të organizojë zgjedhje dhe një referendum për territoret.
Putin vlerësoi gjithashtu se presidenti amerikan Donald Trump ka “një dëshirë të sinqertë” për një marrëveshje paqeje, ndonëse nuk ka ende një datë për takimin e radhës mes tyre, pas samitit të profilit të lartë në Alaskë. Nga ana tjetër, Trump kritikoi ashpër në një postim në Truth Social aleancën mes Rusisë, Kinës dhe Koresë së Veriut, duke e quajtur “komplot kundër Shteteve të Bashkuara”.
