Helenów Pierwszy, Poloni – 1 Shtator 2025 – Një ngjarje makabre ka tronditur qytezën e vogël Helenów Pierwszy në qarkun Konin, ku një nënë 32-vjeçare dhe dy vajzat e saj, të moshës gjashtë dhe tetë vjeç, u gjetën të pajeta në një depo septike pranë banesës.

Alarmi u dha të dielën në mbrëmje rreth orës 22:18, kur babai i vajzave raportoi mungesën e tyre tek shërbimet e emergjencës, duke i paralajmëruar për shenja shqetësuese se gruaja dhe fëmijët mund të kishin rënë në tankun e ujërave të zeza. Në vendngjarje u nisën menjëherë katër njësi zjarrfikëse dhe një ekip zhytësish, por para se të mbërrinin forcat, dy persona kishin arritur të nxirrnin trupin e nënës dhe njërës prej vajzave. Vajza tjetër mbeti e bllokuar në depo deri në ndërhyrjen e shpëtimtarëve.

Mjekët konfirmuan vdekjen e menjëhershme të nënës, ndërsa fëmijët u transportuan në spital, ku fatkeqësisht ndërruan jetë. Media lokale Fakt raportoi se gruaja mund të ketë kryer një vrasje–vetëvrasje, pasi në banesë u gjet një letër lamtumire dhe se ajo kishte marrë më parë trajtim psikiatrik. Sipas burimeve, dyshohet se ajo ka prerë fytin para se të mbytej bashkë me fëmijët.

Banorët e fshatit shprehën tronditje të madhe. “E gjithë fshati është në gjendje shoku dhe trishtimi të thellë,” tha Andżelika Kamińska, kryetarja e fshatit. Një fqinj tregoi se në momentin e ngjarjes, babai i vajzave ndodhej në farmaci për të marrë ilaçe, pasi ishte dërguar atje nga e shoqja.

Prokuroria e Koninit ka hapur hetim penal për vrasje nën nenin 148, pika 3 të Kodit Penal të Polonisë, që parashikon krimet ku vriten më shumë se një person. Autopsitë dhe testet toksikologjike janë caktuar të kryhen të enjten.

Zyrtarët e prokurorisë theksuan se megjithëse dyshimet për një vrasje–vetëvrasje janë të forta, asnjë skenar, nga aksidenti tek vetëvrasja e pastër, nuk është përjashtuar ende.