Presidenti ukrainas Volodymyr Zelensky deklaroi se forcat ukrainase po përgatiten për sulme të reja të thella brenda territorit rus. Në një mesazh në rrjetin X, pas takimit me gjeneralin Oleksandr Syrsky, ai tha: “Do të vazhdojmë operacionet aktive në mënyrën që i nevojitet mbrojtjes së Ukrainës. Forcat dhe resurset janë gati. Janë planifikuar edhe goditje të reja.”

Kjo deklaratë vjen pas një serie sulmesh të rënda ruse mbi Kievin, ku humbën jetën dhjetëra civilë, përfshirë edhe fëmijë. Sipas analistëve ushtarakë, paralajmërimi i Zelenskyt synon të tregojë se Ukraina është ende në gjendje të godasë thellë në territorin rus, pavarësisht përpjekjeve të Moskës për të paraqitur fitore propagandistike dhe për të bindur Perëndimin se fitorja ruse është e pashmangshme.