Një histori tronditëse e sigurisë dhe dështimit të kontrolleve kufitare ka dalë në dritë në Britani, pasi është zbuluar se një shqiptar i dënuar për vrasje në atdhe arriti të hynte dy herë ilegalisht në Mbretërinë e Bashkuar, ku vijoi jetën e krimit.
Edmond Kallmi, 50 vjeç, i cili në vitin 1998 vrau një grua në Shqipëri duke e qëlluar para syve të fëmijës së saj njëvjeçar, u ekstradua më 2009 nga Britania për të vuajtur dënimin në atdhe. Por vetëm pak vite më vonë ai arriti të kthehej sërish ilegalisht në Angli, ku u vendos në Pontypridd me bashkëshorten dhe vajzën e tij.
Në tetor 2022, Kallmi u përfshi në një konflikt rrugor në Ferndale të Uellsit dhe, sipas dëshmive në gjykatë, nxori një armë false duke kërcënuar një grua shofer:
How about f****** shoot you, you b****?”, – i tha ai viktimës së tmerruar.
Gjykata e Merthyr Tydfil e shpalli fajtor për posedim të një arme imituese me qëllim frikësimi dhe në vitin 2023 e dënoi me 18 muaj burg. Pas daljes nga burgu, ai u transferua në qendrën e deportimit Colnbrook Immigration Removal Centre.
⚖️ Një e kaluar kriminale e errët
- Në Shqipëri, Kallmi u dënua për një vrasje makabre në vitin 1998, pasi me një bashkëpunëtor sulmuan shtëpinë e një rivali dhe qëlluan për vdekje gruan e tij, teksa mbante foshnjën në krahë.
- Në 2007 në Britani, ai u dënua me dy vite burg për plagosje me thikë.
- Në 2009 u ekstradua në Shqipëri dhe më 2012 gjykata shqiptare konfirmoi dënimin për vrasje.
Ekspertë të emigracionit e cilësuan rastin “shembull perfekt të dështimit të kufijve britanikë”.
Robert Bates, nga Centre for Migration Control, deklaroi:
“Ky njeri është një kërcënim serial. Është e paimagjinueshme që arriti të largohej, të dëbohej dhe sërish të hynte në Britani. Politikanët po dështojnë duke e lënë publikun të pambrojtur.”
Ndërsa Home Office nuk dha detaje për deportimin e tij, duke theksuar vetëm se qeveria është e angazhuar të largojë nga vendi çdo të huaj të dënuar për krime të rënda.
