Tiranë – Kryeqyteti është përfshirë pak minuta më parë nga një uragan i fuqishëm, i cili ka shkaktuar panik dhe dëme të shumta materiale. Pamjet e para të regjistruara nga qytetarët tregojnë skena dramatike, me erëra të fuqishme që shkulnin pemë, përmbysnin makina dhe dëmtonin çatitë e ndërtesave.

Rrugët e Tiranës u mbuluan me mbeturina e degë të thyera, ndërsa kalimtarët shihen duke vrapuar për t’u strehuar. Forcat e emergjencës ndodhen në terren për të menaxhuar situatën, ndërsa autoritetet u kanë bërë thirrje qytetarëve të qëndrojnë në banesa dhe të shmangin lëvizjet e panevojshme.

Raportimet e para flasin për disa dëme të konsiderueshme në infrastrukturë dhe ndërprerje të energjisë elektrike në disa zona të kryeqytetit. Deri më tani nuk ka njoftime zyrtare për viktima, por ekipet e shpëtimit po verifikojnë terrenin.

Ky është një prej fenomeneve atmosferike më të forta që ka goditur ndonjëherë Tiranën, duke ngritur shqetësime të mëdha mbi gatishmërinë e qytetit për përballimin e fatkeqësive natyrore.