Një aksident i rëndë ajror ndodhi të enjten rreth orës 17:30 GMT në Radom-Sadków, Poloni, ku një avion F-16 i Forcave Ajrore Polake u rrëzua gjatë provave për spektaklin ajror që ishte planifikuar të mbahej këtë fundjavë. Avioni përfundoi në pistë, duke shkaktuar dëmtime serioze në shtratin e saj dhe duke detyruar autoritetet të anulojnë aktivitetin.

Zëdhënësi i qeverisë, Adam Szlapka, konfirmoi vdekjen e pilotit në rrjetin social X dhe bëri të ditur se ministri i Mbrojtjes ishte nisur menjëherë drejt vendngjarjes. Zona u rrethua nga shërbimet e emergjencës, ndërsa hetuesit po përgatiten të analizojnë shkaqet e rrëzimit. Deri më tani nuk janë dhënë detaje shtesë mbi rrethanat e aksidentit, i cili ka tronditur opinionin publik polak dhe komunitetin ushtarak.