Policia e Shtetit ka finalizuar një tjetër superoperacion, duke vënë në pranga dy vëllezër të shpallur në kërkim ndërkombëtar nga drejtësia italiane.
Operacioni policor i koduar “Operacionalja 64”, i zhvilluar nga Drejtoria e Forcës së Posaçme Operacionale në DPPSh, çoi në lokalizimin dhe arrestimin e Roland Metushit (47 vjeç) dhe Saimir Metushit (45 vjeç), të dy banues në Divjakë.
Dy vëllezërit ishin dënuar nga Gjykata e Novarës në Itali, respektivisht me 7 dhe 5 vite burgim, për veprat penale “Organizata kriminale” dhe “Trafikimi i lëndëve narkotike”. Ata akuzohen si pjesë e një grupi të fuqishëm kriminal që merrej me trafikun e lëndëve narkotike drejt Europës.
Pas informacioneve të siguruara nga strukturat e Policisë Kriminale, u organizua operacioni që çoi në kapjen e tyre. Materialet procedurale janë referuar në Prokurorinë pranë Gjykatës së Shkallës së Parë Fier, ndërsa Interpol Tirana, në bashkëpunim me Interpol Romën, po ndjek procedurat për ekstradimin e tyre në Itali.
