Pas tre javësh pushimesh, Kryeministri Edi Rama është rikthyer në zyrë dhe ka nisur konsultimet për formimin e qeverisë së tij të katërt. Edhe pse ende nuk ka një datë për thirrjen e Asamblesë së Partisë Socialiste ku do të shpallet kabineti i ri, lëvizjet kanë filluar.
Në kryeministri u panë duke hyrë Delina Ibrahimaj, aktualisht ministre e Sipërmarrjes, dhe Ervin Mete, ish-ministër i Financave. Pas tyre iu bashkuan Belinda Balluku, zv/kryeministre, dhe Petrit Malaj, ministri aktual i Financave.
Surpriza e ditës ishte prania e biznesmenit dhe politikanit kosovar Behgjet Pacolli, i cili doli nga zyrat e qeverisë pas takimit me Ramën. Pacolli, një emër i njohur në Kosovë dhe Zvicër, ka shërbyer si president, ministër i Jashtëm dhe zv.kryeministër i Kosovës, ndërsa është edhe themelues i kompanisë së ndërtimit Mabetex Group. Ai njihet për veprimtarinë e tij si filantrop dhe për ndërmjetësime në çështje diplomatike.
Edhe pse nuk ka informacion zyrtar për arsyen e këtyre takimeve, pritet që gjatë javëve të ardhshme Rama të vijojë konsultimet, duke gërshetuar projektet e qeverisë me arkitekturën e re të kabinetit. Përfshirja e Pacollit ka shtuar interesin politik, duke ngritur pyetje nëse ai mund të marrë një rol të drejtpërdrejtë në qeverinë e re shqiptare. A është ky një sinjal që Pacolli mund të futet në kabinet si ministër?
