Në fillim të vitit 2025, Elon Musk, personi më i pasur në botë, i kërkoi CEO-së së Meta-s, Mark Zuckerberg, ndihmë financiare për një blerje prej 97.4 miliardë dollarësh të OpenAI, sipas dokumenteve gjyqësore të publikuara të enjten. Kjo lidhet me procesin gjyqësor mes Musk dhe OpenAI, i nisur vitin e kaluar në një gjykatë federale në Kaliforninë Veriore. Së fundmi, gjykata i lejoi OpenAI të vijojë me kundërpadi ndaj Musk.

Musk, i cili bashkëthemeloi OpenAI në 2015 si organizatë jofitimprurëse me Sam Altman dhe të tjerë, u përplas me drejtuesit kur kompania nisi të transformohej . Marrëdhënia e tij me Altman, dikur miqësore, është kthyer në armiqësi të hapur, sidomos pasi OpenAI u bë lider i inteligjencës gjenerative me miliarda investime nga Microsoft. Musk krijoi kompaninë rivale xAI në vitin 2023, duke e shpallur si konkurrent të drejtpërdrejtë të OpenAI. Ai më pas paditi OpenAI për shkelje kontrate dhe tentoi të ndalonte ndryshimin e saj në strukturë fitimprurëse.

Në kundërpadinë e saj, OpenAI pretendon se oferta e Musk për blerje ishte një “manovër e rreme” që dëmtoi biznesin e kompanisë, ndërsa akuzon Musk për “ngacmim” përmes gjykatës, mediave dhe rrjeteve sociale. Dokumentet gjyqësore tregojnë se xAI dhe Musk u përpoqën të formonin një konsorcium investitorësh dhe iu drejtuan Zuckerberg-ut me një letër për financim, por Meta nuk e nënshkroi atë.

Ndërkohë, OpenAI ka kërkuar të thirret Meta për të dorëzuar komunikimet me Musk mbi këtë çështje. Meta ka kundërshtuar duke thënë se se informacionet duhet të merren nga vetë Musk dhe xAI. Një zëdhënës i Meta refuzoi të komentojë, ndërsa avokati i Musk nuk iu përgjigj kërkesave të mediave.

Meta, nga ana tjetër, po investon fuqishëm në zhvillimin e AI–së dhe raportohet se ofron paketa pagese mbi 100 milionë dollarë për të tërhequr studiues kryesorë dhe për të rekrutuar punonjës të OpenAI.