Kryeministri i Izraelit, Benjamin Netanyahu, ka reaguar ashpër ndaj një raporti të fundit të Kombeve të Bashkuara, i cili shpall gjendje urie në Gaza dhe fajëson pengesat sistematike të Izraelit për përkeqësimin e situatës humanitare.

Në një deklaratë të publikuar nga zyra e tij, Netanyahu e cilësoi raportin si:

“Një gënjeshtër të hapur. Izraeli nuk ka një politikë për zinë e bukës – përkundrazi, Izraeli ka një politikë për parandalimin e zisë së bukës.”

Ai akuzoi Hamasin për manipulim dhe keqpërdorim të ndihmave humanitare, duke thënë se:

“Të vetmit që vdesin qëllimisht nga uria në Gaza janë pengjet izraelite që mbahen nga Hamasi.”

Raporti i OKB-së: Uria “e shmangshme” po të mos kishte pengesa
Në raportin e lëshuar sot, OKB-ja shpalli zyrtarisht zi buke në Rripin e Gazës, duke theksuar se situata:

“Mund të ishte shmangur po të mos kishte pasur pengim sistematik nga ana e Izraelit në dërgimin e ndihmave jetike.”

Por Zyra e Kryeministrit izraelit e kundërshtoi këtë vlerësim, duke theksuar se raporti injoron përpjekjet humanitare të Izraelit dhe se mungesat ishin të përkohshme, të shkaktuara nga vjedhjet sistematike të ndihmave nga Hamasi.