Një ngjarje e rëndë ka tronditur New Hampshire-in, ku një nënë e tre fëmijëve kreu një vrasje-vetëvrasje makabre brenda banesës së saj luksoze. Autoritetet konfirmojnë se Emily Long, 34 vjeç, qëlloi për vdekje bashkëshortin e saj Ryan Long, 48 vjeç, i cili vuante nga një tumor terminal në tru, si dhe dy fëmijët e tyre, Parker, 8 vjeç dhe Ryan, 6 vjeç, përpara se t’i drejtonte armën vetes. Fëmija më i vogël, 3-vjeçar, mbeti i padëmtuar dhe aktualisht ndodhet në kujdesin e të afërmve.

Autopsia ka zbuluar se Emily vdiq nga një plagë e vetme me armë zjarri, ndërsa vrasja e bashkëshortit dhe dy fëmijëve u konfirmua si homicid. Pak ditë para ngjarjes, ajo kishte publikuar video të trishtuara në TikTok, ku tregonte betejën e bashkëshortit me glioblastomën dhe vështirësitë e saj mendore. Në një postim të fundit, Emily rrëfente: “Gjithçka që dua është të fshihem nën batanije me fëmijët, por e di që nuk është e shëndetshme. Po përpiqem të dal nga depresioni, edhe nëse nuk dua.”

Hetuesit e cilësojnë rastin si një prej më tragjikëve të viteve të fundit, ndërsa motivet e sakta mbeten të paqarta. Prokuroria theksoi se familja po përballej me presion të madh emocional dhe ekonomik për shkak të sëmundjes terminale të kryefamiljarit.