HOUSTON, Teksas — Një video që po qarkullon me shpejtësi në rrjetet sociale tregon momentin kur dy influencerë ushqimi i shpëtojnë për mrekulli vdekjes, pasi një automjet SUV u përplas përmes xhamit të një restoranti dhe u fut drejt në tavolinën e tyre, duke i hedhur në tokë mes copëzave të xhamit.
Ngjarja ndodhi të shtunën, rreth orës 16:40, në CuVee’s Culinary Creations në perëndim të Houstonit. Nina Santiago — krijuese përmbajtjeje me kanalin në YouTube “Nina Unrated”, i cili numëron gati 400 mijë abonentë — po filmonte veten teksa hante bashkë me të dashurin e saj, Patrick Blackwood, kur SUV-ja papritur u fut brenda lokalit.
Në videon virale, automjeti shihet teksa “shpërthen” përmes fasadës së xhamit pikërisht në momentin kur çifti po kafshonte një mini-sanduiç (slider). Goditja rrëzon tavolinën dhe e hedh Santiagon në dysheme, ndërsa xham i thyer shpërndahet kudo.
Ende nuk dihet shkaku i aksidentit. Pasi doli nga spitali, Santiago publikoi në Instagram foto ku shfaqen plagë me gjak në fytyrë dhe në krahë, si dhe një mesazh i shkurtër reflektiv: “Nesër nuk është i garantuar.”
Autoritetet nuk kanë bërë të ditur menjëherë më shumë detaje mbi drejtuesin e mjetit apo gjendjen e tij. Stafi i restorantit u pa duke i ardhur në ndihmë çiftit dhe duke siguruar zonën, ndërsa dëshmitarë thanë se zhurma e përplasjes u dëgjua në të gjithë ambientin.
