Një ngjarje tragjike ka tronditur komunitetin në Brisbane, Australi, ku një baba dhe djali i tij 4-vjeçar humbën jetën pasi u përplasën nga një automjet i drejtuar nga një shofer i dyshuar për drejtim nën ndikimin e alkoolit.
Braiden Ashley Timmins, 33 vjeç, dhe djali i tij Hendrix-Hemi Te Rongomau King, ishin duke ecur përgjatë Green Road, në zonën Regents Park, rreth orës 11:15 paradite të së dielës, kur një makinë tip ute i goditi për vdekje.
U kapën nga kamerat pak minuta para tragjedisë
Pamje të siguruara nga kamera sigurie, të publikuara nga The Courier Mail, tregojnë momentet prekëse të fundit të babait dhe të birit.
Në video, vogëlushi shihet teksa ngas biçikletën e tij rozë në trotuar, me një helmetë rozë dhe blu, i veshur me bluzë të zezë dhe pantallona të shkurtra. Ai i tregon rrugën përpara babait të tij, ndërsa ky i fundit ecte pas tij, i veshur me pantallona të zeza dhe bluzë të bardhë.
Pamjet tregojnë djalin teksa ndalet për të pritur babain e tij që të afrohet, përpara se të dy të vazhdojnë rrugën drejt Green Road – dhe të dalin nga fusha e kamerës.
Vetëm pak minuta më vonë, do të ndodhte tragjedia që do t’u merrte jetën të dyve.
Shoferi i dyshuar akuzohet për vrasje pa paramendim
Trevor William Galbraith, 41 vjeç, është arrestuar dhe akuzuar për dy akuza të vrasjes pa paramendim (manslaughter).
Policia pretendon se ai ishte duke drejtuar mjetin nën efektin e alkoolit, në momentin që përplasi babain dhe djalin me automjetin e bardhë tip LDC dual cab. Pas testit të alkoolit në vendngjarje, ai rezultoi pozitiv, dhe më pas u dërgua në spital për të dhënë një mostër gjaku për testime të mëtejshme.
Ishin nisur për të blerë akullore
Sipas autoriteteve, Braiden dhe Hendrix ishin nisur vetëm disa rrugica më tutje nga shtëpia e tyre në Crestmead, për të blerë një akullore – një shëtitje e thjeshtë që përfundoi në mënyrën më të tmerrshme të mundshme.
Galbraith u lajmërua në paraburgim në Gjykatën e Beenleigh të hënën, ndërsa çështja u shty për në 20 tetor. Njësia e analizës së aksidenteve forenzike u rikthye në vendin e ngjarjes të martën, ndërsa hetimet vijojnë.
Nderime prekëse në vendin e ngjarjes
Qytetarë të shumtë kanë mbërritur në vendin e aksidentit për të lënë lule, lodra pelushi dhe akullore, si një nderim prekës për babanë dhe djalin që humbën jetën në mënyrë tragjike.
Një komunitet i tërë në zi për një akt që mund të ishte shmangur – ndërsa kërkohet drejtësi për jetët e humbura padrejtësisht.
