Njoftimi i kryeministrit Edi Rama për t’i dhënë fund praktikës së njohur si “shitja në gropë” – ku apartamentet shiten që në fazat e para të ndërtimit, përpara përfundimit të projektit – ka shkaktuar tronditje në tregun e pasurive të paluajtshme, veçanërisht në Tiranë.
Kjo mënyrë financimi ka qenë një nga motorët kryesorë të zhvillimit të projekteve të reja ndërtimore, duke u mundësuar kompanive të sigurojnë kapital nga paradhëniet e blerësve për të përfunduar ndërtimet. Me ndalimin e saj, shumë zhvillues dhe agjentë imobiliarë po përballen me pasiguri të madhe për të ardhmen e sektorit.
Agjenti imobiliar Pëllumb Stoli parashikon se masat e reja do të shkaktojnë një periudhë fillestare paniku dhe ngadalësimi të shitjeve, por më pas tregu mund të pësojë një kthesë të rëndësishme.
“Pas një periudhe të parë pasigurie, çmimet mund të stabilizohen dhe madje të fillojnë të bien, pasi tregu do të përshtatet me kërkesën reale dhe me financimin tradicional nga bankat,” – shprehet Stoli.
Sipas ekspertëve, qëllimi i ndalimit është të mbrojë blerësit nga rreziqet e projekteve të papërfunduara dhe të rrisë transparencën në sektor, duke u siguruar që shitja e një apartamenti të bëhet vetëm pasi objekti është gati për dorëzim ose në faza të sigurta ndërtimi.
Megjithatë, ky ndryshim pritet të transformojë rrënjësisht mënyrën se si ndërtohet dhe shitet sot në Shqipëri. Zhvilluesit mund të përballen me nevojën për kapital më të madh fillestar, ndërsa blerësit mund të shohin një rënie të çmimeve në afatmesëm, por edhe një ngadalësim të ritmit të projekteve të reja.
Në javët në vijim pritet që qeveria të publikojë detajet ligjore të masës, ndërsa tregu i pasurive të paluajtshme po hyn në një fazë të re ku ritmi i ndërtimit, çmimet dhe modeli i financimit mund të ndryshojnë rrënjësisht.
