Të dhënat zyrtare nga Ministria e Brendshme britanike zbulojnë se mijëra azilkërkues po përdorin kartat parapagese të dhëna nga shteti për të mbuluar nevojat bazë, për të financuar lojërat e bixhozit në kazino, salla lojërash dhe pika bastesh. Gjatë vitit të fundit, mbi 6,500 azilkërkues kanë kryer të paktën një përdorim të tillë për bixhoz, duke shkaktuar reagime të forta politike dhe kërkesa për ndërhyrje urgjente.
Kartat e njohura si “Aspen” shpërndahen në mënyrë paraprake për ushqim, veshmbathje dhe nevoja të tjera, ndërsa shumë prej përfituesve jetojnë në hotele të financuara nga taksapaguesit. Megjithëse Ministria e Brendshme monitoron përdorimin e kartave, ato nuk bllokojnë pagesat në vende specifike, duke lejuar kështu abuzime.
Sekretari i Brendshëm në hije, Chris Philp, e konsideroi këtë situatë “një fyerje për taksapaguesit” dhe kërkoi dëbimin e emigrantëve që kalojnë ilegalisht kufirin. Politikanë të tjerë shprehen se kjo situatë rrit edhe industrinë e bixhozit dhe theksojnë nevojën për masa të forta kundër abuzimeve.
Ministria e Brendshme ka nisur hetime për këtë skandal, ndërkohë që shqetësimet shtohen edhe për punësimin ilegal të azilkërkuesve në sektorë të ndryshëm, duke përfshirë ekonominë “gig”. Qeveria po kërkon mënyra për të ndaluar këtë fenomen, por sfidat mbeten të mëdha.
Ky lajm vjen në një kohë kur presioni mbi sistemin e azilit dhe kapacitetet e akomodimit po rritet ndjeshëm, duke nxitur debat dhe protesta në disa qytete të Britanisë.
