Një ngjarje shqetësuese është regjistruar në qytetin e Lvivit, Ukrainë, ku një qytetar është ndaluar dhe futur me forcë në një automjet nga persona të veshur me uniformë ushtarake. Videoja e incidentit, e publikuar në rrjetet sociale, tregon momentin kur burri, i cili kishte dalë për të shëtitur qenin, mbahet me forcë dhe më pas shtyhet drejt një furgoni, pranë hyrjes së një ndërtese banimi.

Ngjarja është denoncuar nga e dashura e tij, e cila shkruan: “E morën me forcë pranë shtëpisë. Ai kishte dalë me qenin. Kur dola, po e tërhiqnin në makinë.”

Pamjet kanë shkaktuar reagime të forta në rrjet dhe janë bërë virale, duke ngritur shqetësime serioze për mënyrën se si po zbatohet mobilizimi ushtarak në Ukrainë. Shumë komentues e kanë konsideruar këtë veprim si një shkelje të të drejtave themelore të qytetarëve.

Autoritetet në Lviv kanë reaguar duke thënë se janë duke verifikuar ngjarjen dhe përfshirjen e mundshme të përfaqësuesve të Qendrës së Rekrutimit Ushtarak. Sipas mediave lokale, janë në proces hetimi për të përcaktuar nëse incidenti është pjesë e një praktike të qëllimshme të mobilizimit me forcë, apo një veprim i paligjshëm individual.

Kjo ngjarje vjen në një kohë kur tensionet dhe kritikat ndaj mënyrës së rekrutimit në Ukrainë janë rritur, me raste të ngjashme të raportuara edhe më parë në qytete të tjera. Në mungesë të transparencës dhe përgjigjeve të qarta nga autoritetet, shqetësimi i opinionit publik po rritet çdo ditë.