Banorët pranë Eileen Holland thonë se nuk e kishin parë kurrë kriminelin rumun me thikë që trashëgoi shtëpinë e saj – as kur ajo ishte gjallë, as në varrimin e saj dhe as kur policia bastisi shtëpinë e vjetër të viteve ’30 dhe zbuloi se ishte kthyer në një fermë kanabisi.
Zonja Holland, një mësuese në pension dhe ish-kandidate e Liberal Demokratëve për këshillin bashkiak, kishte jetuar vetëm për mbi 40 vjet në rrugën Windsor Avenue në Uxbridge, Londra Perëndimore. Ajo nuk kishte fëmijë dhe as familje të afërt dhe ishte bërë gjithnjë e më e brishtë në vitet e fundit. Me katarakte që e kishin lënë thuajse të verbër, fqinjët e ndihmonin shpesh për të lexuar postën.
Kur ajo u gjet e vdekur në tetor 2019, policia mori të vetmin çelës që ekzistonte. Vdekja e saj nuk u konsiderua e dyshimtë. Meqë nuk kishte testament dhe nuk kishte trashëgimtarë të njohur, prona u përfshi në listën shtetërore të “Bona Vacantia”, duke u parashikuar të kalonte në pronësi të Kurorës. Fqinjët menduan se aty përfundonte gjithçka.
Por katër vjet më vonë, disa burra nga Europa Lindore mbërritën në shtëpi, duke thënë se kishin “gjetur një trashëgimtar” dhe ishin aty për të ndërruar bravën. Shtëpia kishte mbetur e paprekur që nga vdekja e zonjës Holland, me të gjitha sendet ende brenda.
Testamenti, që doli papritur dhe datonte më 24 shkurt 2019 – ditëlindja e saj e 90-të – linte 2,000 paund për Shoqatën Britanike të Zemrës, 1,000 për Fondin Botëror të Natyrës dhe gjithë pjesën tjetër të pasurisë “Aurel Mezei-t”.
Asnjë nga fqinjët nuk e kishte dëgjuar ndonjëherë këtë emër. Aurel Mezei, një 44-vjeçar me tatuazhe nga Baia Mare, Rumani, nuk ishte parë kurrë ta vizitonte Eileen-in dhe nuk mori pjesë në varrim. Në rrjetet sociale, ai shfaqet me thikë të madhe “zombie”, zinxhir ari dhe shisha – aspak profili i dikujt që një mësuese e moshuar do të zgjidhte si trashëgimtar.
Brenda dy javësh nga lëshimi i dokumentit të trashëgimisë, Mezei regjistroi një firmë të re me emrin “Uxbridge Property Investments Ltd”, me adresë një apartament pranë aeroportit të Heathrow. Fqinjët besojnë se ai e kishte parë shtëpinë në listën e pronave të pashpallura dhe kishte falsifikuar testamentin për të përfituar.
Kur banorët ngritën dyshime pranë policisë për testamentin dhe për burrat që ndryshuan bravën, u tha se nuk ishte çështje për hetim penal. Vetëm pas një denoncimi tjetër në qershor 2024 – për gjashtë burra që silleshin në mënyrë të dyshimtë – policia ndërhyri. Pesë persona u arratisën. Brenda shtëpisë u gjet një plantacion i plotë kanabisi.
Abdi Gjeta, 41 vjeç, u arrestua dhe më pas u gjobit me 187 paund pasi pranoi fajësinë për përfshirje në kultivimin e kanabisit. Brenda dy muajsh, shtëpia u shit për 375 mijë paund përmes një agjencie në Londrën Perëndimore. Mezei dorëzoi pasaportën, certifikatën e vdekjes së Holland, testamentin dhe dokumentin e trashëgimisë.
Punonjësit e agjencisë thanë se shtëpia ishte në gjendje aq të keqe sa nuk mund të bëhej asnjë foto për shitje.
Që nga ajo kohë, Mezei nuk është parë më në Britani. Një hetim i MailOnline ka zbuluar se të dy dëshmitarët e testamentit kishin ndërruar jetë përpara se të paraqitej dokumenti – dhe familjet e tyre thonë se nuk kishin asnjë lidhje me zonjën Holland. Nënshkrimet nuk përputheshin me ato të vërtetat. Megjithatë, dokumenti kaloi pa asnjë sfidë në gjykatë.
Jeff Barnes, një i afërm i largët i zonjës Holland, e quajti gjithë këtë një mashtrim që kërkon hetim të thellë. Ai tha: “Më duket e qartë që ky njeri e ka marrë shtëpinë në mënyrë të paligjshme. Është neveritëse që ia ka dalë. Ka përfituar nga një e moshuar pa mbrojtje dhe tani mund të jetë zhdukur.”
Pas shitjes në gusht 2024, shtëpia u rinovua plotësisht. U ndërtua një kat tjetër, u shtuan dhoma, kopshti u betonua, dhe gjithçka brenda u kthye në dizajn modern e pa shpirt. U përpoqën ta shisnin për 730 mijë paund, por marrëveshja dështoi pas një hetimi nga Regjistri i Pasurive. Tani është në shitje për 600 mijë paund, mbi mesataren e rrugës.
Shtëpia ndodhet aktualisht në një status ligjor të paqartë, ndërsa dokumentet e shitjes janë ende nën shqyrtim. Por ata që e njihnin Eileen Holland nuk kanë harruar një fakt: burri që e shiti shtëpinë e saj për 375 mijë paund nuk u pa kurrë sa ajo ishte gjallë.
