Ky është momenti kur një përleshje e dhunshme shpërtheu në shkallët e një stacioni të mbushur të metrosë në Londër – me një fëmijë të vogël që përfundon duke qarë në dysheme mes kaosit.

Sherri shpërtheu mes një grupi burrash në hyrje të stacionit Highbury and Islington, gjatë orarit të pikut mbrëmjen e djeshme.

Të tmerruar, kalimtarët bërtisnin për të ndërhyrë, ndërsa grupi dukej se po shtynte një burrë nëpër shkallë, duke e goditur me grushta e shqelma.

Policia e Transportit Britanik po heton tashmë pamjet e filmit të ngjarjes, të cilat po qarkullojnë në rrjetet sociale.

Në video shihet një burrë i veshur mirë që i jep një goditje me këmbë në kokë një personi me një tuta gri – ndërsa një tjetër hedh një çantë shpine në turmën e mbushur.

Udhëtarët përpiqen të ndajnë sherrin dhe të ndihmojnë një nënë me karrocë që të largohet bashkë me foshnjën e saj.

Dëshmitarët e tmerruar vrapojnë të marrin një fëmijë të vogël që ka mbetur i vetëm duke qarë në dysheme, ndërsa dhuna vazhdon.

Një tjetër burrë ngre këmbët për të goditur dy të tjerë, por menjëherë tërhiqet në tokë nga tre burra dhe më pas goditet vazhdimisht nga burri me kostum. Viktima përfundon i shtrirë me shpinë nëpër shkallë dhe shihet teksa përpiqet të zvarritet për t’u larguar, ndërsa vazhdon të goditet.

Një grua përpiqet të qetësojë situatën, por largohet shpejt pasi rrezikon të goditet. Ndërkohë, një tjetër grua me fustan të verdhë shihet duke mbajtur për krahu një prej burrave të përfshirë në përleshje.

Zëdhënësi i Policisë së Transportit Britanik deklaroi: “Oficerët morën një njoftim për një përleshje në stacionin Highbury and Islington rreth orës 17:30 pasdite më 17 korrik. Oficerët janë në dijeni të pamjeve që po qarkullojnë në rrjete sociale dhe ngjarja po hetohet. Kushdo që ka informacion, lutet të dërgojë një mesazh në 61016 me referencë 558 të datës 17 korrik.”