Në një veprim të paprecedentë, autoritetet turke kanë urdhëruar ndalimin dhjetëditor të transmetimeve për dy nga kanalet kryesore të opozitës, Halk TV dhe Sözcü TV, duke thelluar edhe më tej krizën e lirisë së medias në vend. Këshilli i Radios dhe Televizionit (RTÜK) e justifikoi vendimin me “nxitje të urrejtjes dhe armiqësisë”, ndërsa vëzhguesit e pavarur e cilësojnë këtë si një përpjekje për të heshtur zërat kritikë, në një vend ku mbi 95% e mediave kontrollohen tashmë nga qeveria ose aleatë të saj.
Veprimi vjen në një moment të tensionuar politik, me shumë drejtues të opozitës në burg dhe ndërkohë që procesi i paqes me PKK-në po shkakton përçarje të thella. Reagimet e ashpra nuk kanë munguar, si nga opozita ashtu edhe nga zyrtarë evropianë, të cilët e kanë krahasuar situatën me një distopi orwelliane. Liria e shprehjes në Turqi, sipas organizatës Reporterët pa Kufij, është më e kufizuara në Europë, duke e renditur vendin në vendin e 159-të nga 180 shtete në indeksin global.
