Dy video të publikuara së fundmi në TikTok, ku shfaqen adoleshentë duke ecur në rrugët e Vlorës me thika në duar dhe me qëllim të qartë për t’u përfshirë në një sherr, kanë tronditur rrjetin dhe opinionin publik. Pamjet, të xhiruara nga vetë të rinjtë dhe të postuara me krenari në rrjet, përfaqësojnë një kombinim të rrezikshëm mes dhunës dhe vetëpromovimit digjital.

Në secilën prej videove, djemtë ecin me vetëbesim dhe agresivitet, duke shfaqur armët e ftohta si pjesë e një identiteti të rremë “të forti”, ndërkohë që shoqërohen nga muzikë sfiduese në sfond. Edhe më shqetësues është fakti se nëpër komente, shumë bashkëmoshatarë shfaqen përkrahës dhe madje inkurajues ndaj kësaj lloj sjelljeje, duke e glorifikuar dhunën si mënyrë për të fituar vëmendje dhe respekt.

Rikthimi i TikTok-ut pas bllokimit të mëparshëm duket se po shoqërohet me një valë përmbajtjesh toksike, ku kufiri mes argëtimit dhe rrezikut fshihet gjithnjë e më shumë. Ngjarje si kjo ngrenë alarmin për nevojën urgjente të edukimit digjital dhe ndërhyrjes së strukturave arsimore e familjare për të frenuar shpërndarjen dhe normalizimin e dhunës në rrjet.