Në një analizë të gjatë në Foreign Affairs, gjenerali izraelit në pension Amos Yadlin përshkruan pasojat strategjike të fushatës së suksesshme ajrore të Izraelit kundër programit bërthamor të Iranit, të njohur si “Operacioni Luani që Ngrihet”. Në qershor 2025, për herë të parë, Izraeli me ndihmën e SHBA-së arriti të shkatërrojë infrastrukturën e thellë, të mbrojtur dhe teknologjikisht të avancuar të programit bërthamor iranian, duke vrarë drejtues të lartë ushtarakë dhe shkencëtarë bërthamorë, shkatërruar rreth 80% të mbrojtjes ajrore të Iranit dhe duke reduktuar në mënyrë drastike kapacitetin raketor të Teheranit.

Sipas Yadlin, tani është koha për diplomaci. Me Iranin të dobësuar dhe rrjeti i tij rajonal i aleatëve (Hamas, Hezbollah, regjimi i Asadit) i goditur rëndë, SHBA dhe Izraeli duhet të përdorin këtë moment për të arritur një marrëveshje të re bërthamore dhe për të vendosur një rend të ri rajonal. Një “marrëveshje e madhe” mund të përfshijë: çarmatimin e Hamasit, lirimin e pengjeve, garanci sigurie në Liban e Siri, heqjen e pasurimit të uraniumit nga Irani dhe vendosjen e mekanizmave ndërkombëtarë për monitorim. Ndërsa diplomacia është opsioni më i sigurt për të mbyllur ambiciet bërthamore të Iranit, Yadlin thekson se suksesi ushtarak i operacionit tregoi se “paqja përmes forcës” është ende një formulë funksionale dhe një model për aleancën e ardhshme SHBA-Izrael në një rajon gjithnjë e më të polarizuar.