Një tjetër skandal mjedisor ka shpërthyer në zemër të rivierës shqiptare. Një inxhinier ndërtimi është arrestuar nga policia pasi u kap në flagrancë duke lejuar hedhjen e mbetjeve inerte nga ndërtimi i një hoteli luksoz, direkt në vijën bregdetare të Gjilekës në Dhërmi – një nga zonat më të frekuentuara të jugut.

Bëhet fjalë për 26-vjeçarin Auren Dhono, inxhinier i projektit, i cili u arrestua për veprën penale “Menaxhimi i mbetjeve”. Gjatë kontrollit të ushtruar nga Policia e Himarës në bashkëpunim me IKMT dhe AZHT, u konstatua se jo vetëm që mbetjet e ndërtimit ishin hedhur afër plazhit duke ndotur mjedisin, por dhe se disa vila të kompleksit ishin të banuara pa pasur ende certifikimin e nevojshëm nga autoritetet.

Objekti ndërtimor, në pronësi të ndërtuesit të njohur Ilir Trebicka, u bllokua menjëherë, ndërsa për pronat përreth u mbajt procesverbal për kundërvajtje administrative. Hetimet po vijojnë për të verifikuar përgjegjësitë e mëtejshme.

Ky rast ngre shqetësime të mëdha për abuzimet që po ndodhin në zonat turistike, teksa institucionet nënvizojnë tolerancë zero ndaj çdo akti që cenon ambientin dhe sigurinë e pushuesve.