Papa Leo XIV ka paralajmëruar me tone të forta për rreziqet e rritura nga ndryshimet klimatike, teksa një valë përvëluese e të nxehtit ka përfshirë pjesën më të madhe të Europës. Në një letër publike drejtuar besimtarëve, kreu i 1.4 miliardë katolikëve të botës e lidhi degradimin mjedisor me aktivitetin njerëzor dhe konfliktet e armatosura.
“Fenomenet ekstreme natyrore të shkaktuara nga ndryshimet klimatike të provokuara nga aktiviteti njerëzor po rriten në intensitet dhe frekuencë,” shkruan Papa, duke theksuar se pasojat afatmesme dhe afatgjata të shkatërrimit ekologjik nuk po trajtohen me seriozitetin e duhur.
Komentet e Papës erdhën në kuadër të një dite të posaçme lutjeje për ruajtjen e krijimit, të shpallur nga Kisha Katolike. Ai theksoi se “toka jonë po shkatërrohet” në shumë pjesë të botës, si pasojë e padrejtësive, shkeljeve të të drejtës ndërkombëtare, pabarazive të thella dhe lakmisë së pandalshme që ushqen ndotjen, shpyllëzimin dhe humbjen e biodiversitetit.
Papa Leo XIV, që mori detyrën në maj pas vdekjes së Papa Françeskut, ende nuk e ka konfirmuar pjesëmarrjen në Samitin Botëror të Klimës (COP30) që do të mbahet në Brazil në fund të vitit, por qëndrimi i tij i prerë tregon se mbrojtja e mjedisit do të jetë një nga prioritetet e papatit të tij.
