Sean “Diddy” Combs mund të jetë shpallur fajtor për disa nga akuzat më të rënda ndaj tij, sipas një analize ligjore të publikuar nga CNN, pasi një shënim i jurisë dërguar gjykatësit Arun Subramanian të martën sinjalizoi një kthesë të rëndësishme në proces.

Juria prej tetë burrash dhe katër grash njoftoi se kishte arritur një konsensus mbi akuzat për trafik seksual me forcë dhe transport për qëllime prostitucioni — akuza të lidhura me paditë e ngritura nga ish-e dashura e Combs, këngëtarja Cassie Ventura, dhe një tjetër ish-partnere anonime.

Megjithatë, juria tha se nuk ishte në gjendje të arrinte një vendim për akuzën më të diskutueshme: komplot kriminal në kuadër të një organizate kriminale (racketeering conspiracy). Sipas shënimit drejtuar gjyqtarit, juria ishte e ndarë dhe kishte anëtarë “me mendime të pandryshueshme në të dyja anët”.

Kjo është një shenjë e qartë se Combs është shpallur fajtor për të paktën disa nga akuzat, argumentoi analisti i CNN, Ellie Honig. “Më duket e vështirë të besoj, logjikisht, që ka anëtarë të jurisë që thonë se ai është fajtor për racketeering, por jo për akuzat e tjera për trafik seksual dhe prostitucion,” i tha ai gazetarit Jake Tapper.

Në sallën e gjyqit, Combs u paraqit i tronditur dhe i shqetësuar, sipas një skice gjyqësore. Avokatët e tij nuk pranuan një vendim të pjesshëm dhe gjykatësi Subramanian urdhëroi jurinë të rifillonte diskutimet për të arritur një vendim për të gjitha akuzat.

Por vetëm pak minuta më pas, juria informoi gjykatësin se kishte përfunduar diskutimet për ditën dhe u largua, me gjyqtarin që i inkurajoi të “mbajnë mendje të hapur”.

Nëse Combs shpallet fajtor për akuzën e komplotit kriminal, ai mund të përballet me burgim të përjetshëm.