Një video tronditëse ka dokumentuar momentin kur një person me kapuç nxjerr një thikë të madhe kuzhine dhe sulmon një vajzë të re në mes të një feste në Gladstone Park, në veri-perëndim të Londrës. Pamjet, që janë bërë virale në rrjetet sociale, tregojnë momentin kur vajza e kapur në befasi përpiqet të tërhiqet ndërsa sulmuesi e afrohet me armë në dorë, vetëm pak centimetra larg fytyrës së saj.

Skena ka shkaktuar panik të madh në mesin e të pranishmëve, të cilët dëgjohen duke bërtitur dhe ikur me vrap nga vendngjarja. Pas përplasjes fillestare, agresori shihet teksa konfronton edhe pjesëmarrës të tjerë në festë, përpara se të ndalojë me thikën ende në dorë. Një zë nga turma, që duket se po filmon, dëgjohet duke thënë me habi: “Ajo e nxori thikën? Je në vete?”

Ngjarja ka ndodhur të hënën në mbrëmje (30 qershor), rreth orës 22:00. Policia Metropolitane, pasi u informua për videon në rrjete sociale, mbërriti në vendngjarje por nuk gjeti asnjë person që përputhej me përshkrimin, nuk u gjet asnjë armë dhe nuk u bë asnjë arrestim. Për fat, nuk raportohet për të lënduar.

Incidenti ndodh në një kohë kur krimet me thikë në Londër janë në rritje alarmante, veçanërisht në mesin e të rinjve. Vetëm në vitin 2023 u regjistruan 14,577 krime të lidhura me thikë, një rritje me 20% krahasuar me një vit më parë. Po ashtu, gjatë 12 muajve të fundit, janë vrarë 11 adoleshentë në kryeqytet. Në përgjigje të krizës, Partia Laburiste ka premtuar rikthimin e 13,000 oficerëve policorë në rrugë dhe një plan me pesë pika për të luftuar fenomenin.

Videoja ka nxitur debat të gjerë mbi mungesën e sigurisë në hapësirat publike dhe rolin e policisë në reagimin ndaj krimeve të dhunshme në rritje. Edhe pse askush nuk mbeti i plagosur, ngjarja përforcon ndjenjën e pasigurisë në rrugët e Londrës dhe shton presionin mbi autoritetet për të ndërmarrë masa më të ashpra.