Një incident i pazakontë në plazhin e Vlorës ka nxitur reagimin e menjëhershëm të Policisë Vendore, pas publikimit të një videoje në rrjetet sociale ku shfaqej një automjet duke lëvizur në rërë, pranë pushuesve. Autoritetet kanë ndërhyrë me shpejtësi, duke identifikuar drejtuesin dhe duke marrë masa administrative, ndërsa theksojnë angazhimin për ruajtjen e rendit dhe sigurisë gjatë sezonit turistik.

Reagim i Drejtorisë Vendore të Policisë Vlorë:

Në lidhje me një video të publikuar në rrjete sociale, në të cilën shfaqet një automjet duke lëvizur në bregdet, në zonën e plazhit, në qytetin e Vlorës, ju informojmë se:

Shërbimet e Komisariatit të Policisë Vlorë, në bashkëpunim me specialistët e Sektorit të Policisë Rrugore, kanë lokalizuar automjetin që shfaqet në pamjet e publikuara dhe kanë identifikuar drejtuesin e tij.

Pas shoqërimit të automjetit në ambientet e komisariatit, shtetasit Gj. I. (sqarojmë se ky shtetas nuk është punonjës i Policisë së Shtetit) iu vendos masa administrative 53 000 lekë, për shkeljen e 3 neneve të Kodit Rrugor, “Rregullimi i qarkullimit në qendrat e banuara “Shpejtësia” dhe “Mosrespektimi i sinjalizimit rrugor”.

Drejtoria Vendore e Policisë Vlorë është e angazhuar maksimalisht për të garantuar rendin dhe sigurinë publike gjatë sezonit turistik, me qëllim krijimin e një ambienti të qetë dhe të sigurtë për të gjithë pushuesit, vendas dhe të huaj. Çdo shkelje që cenon këtë objektiv do të trajtohet me zero tolerancë.