Dubai njihet për shkëlqimin, qendrat luksoze të blerjeve dhe horizontin madhështor të qytetit – por pas kësaj fasade të magjepsur fshihet një realitet shumë më i errët.

Gra të reja nga e gjithë bota po joshen për në Emiratet e Bashkuara Arabe me premtime për pushime falas, çanta firmato, festa luksoze dhe mijëra dollarë në dorë. Por kur mbërrijnë atje, përballen me situata të rrezikshme dhe shpesh të tmerrshme.

Burra të pasur maskohen si rekrutues për agjenci të rreme modelingu apo platforma për influencues, duke kontaktuar vajza të reja dhe tërheqëse në rrjetet sociale me premtimin për t’i “fluturuar” drejt Dubait.

Për shumë prej tyre, është një ofertë e parezistueshme. Por pas këtij skenari që duket si ëndërr, fshihet një praktikë e errët që prej vitesh ndodh në vila private, jahte dhe larg vendeve turistike.

Në fillim të këtij viti, 20-vjeçarja Maria Kovalchuk nga Ukraina, u gjet e braktisur në rrugët e Dubait me shtyllën kurrizore dhe gjymtyrët e thyera, pasi sipas raportimeve “kishte rënë nga lartësia”. E njohur në OnlyFans, ajo kishte humbur kontaktin me miqtë e saj pasi kishte thënë se do shkonte në një festë me dy burra që u prezantuan si agjentë të një agjencie modelingu. Maria u zhduk për tetë ditë dhe nuk mban mend çfarë ndodhi.

Miqtë e saj kanë frikë se ajo u rrëmbye për qëllime shfrytëzimi seksual dhe më pas u hodh e gjakosur në rrugë.

Rekrutime nga profile të rreme dhe premtime boshe

Lucy Banks, ish-krijuese në OnlyFans dhe themeluese e agjencisë “Million Billion Media”, paralajmëron se vajzat duhet të jenë shumë të kujdesshme: “Nëntë nga dhjetë mesazhet që marrin janë mashtruese. Këta rekrutues dinë saktësisht çfarë bëjnë dhe si t’i manipulojnë vajzat.”

Shpesh përdoren profile të rreme Instagrami – ku burra shtiren si vajza që jetojnë në Dubai – për të krijuar një ndjenjë “besimi dhe motërsie”. Por gjithçka është një iluzion. “Të premtohet çdo gjë, të ofrohen shuma marramendëse, dhe më pas e kupton se je vetëm dhe askush nuk do vijë të të ndihmojë.”

Viktimat më të zakonshme janë vajza të reja naive, të moshës 18 deri në 25 vjeç. “Një vajzë e zakonshme, pa përvojë në këtë botë, bie lehtë në kurth,” thotë Lucy. “Është një recetë për katastrofë.”

Festa të errëta dhe dhunë e padukshme

Kayla Jade, një modele australiane në OnlyFans, ka folur më parë për “festat e influencuesve” në Dubai. Ajo përshkruan një botë ku burrat e pasur, të mërzitur nga gjithçka tjetër, kërkojnë adrenalinë përmes akteve seksuale poshtëruese si formë dominimi.

“Nëse ke miliona dollarë dhe gjithçka është e arritshme, fillon të kërkosh kënaqësi në shkatërrim,” thotë ajo në një video. “Një influencuese me miliona ndjekës paguhet qindra mijëra dollarë vetëm për t’u poshtëruar në mënyrë brutale.”

“Porta Potty” – termi viral që nuk është i ri

Radha Stirling, aktiviste e të drejtave të njeriut dhe themeluese e organizatës Detained in Dubai, e cila ndihmon të huajt e arrestuar ose të shfrytëzuar në Emirate, thotë se ka mbi 20 vite që dëgjon raportime për abuzime seksuale në festa private në Dubai.

Sipas saj, shumë nga këto gra janë droguar, janë filmuar pa leje ose janë shantazhuar. “Në shumë raste, pasaportat iu janë konfiskuar dhe janë kërcënuar kur përpiqeshin të largoheshin,” thotë Stirling. Festat zhvillohen në vende të izoluara ku është e vështirë të kërkosh ndihmë.

Rekrutimi i tyre ndjek modele globale – përmes Instagramit, agjencive të modelingut, apo ofertave për “rritje profesionale”. Viktimat vijnë nga vende dhe profile të ndryshme, përfshirë edhe profesioniste si juriste, këngëtare apo aktore.

“Ku nuk ka llogaridhënie dhe viktimat ndëshkohen në vend që të mbrohen, këto mjedise mbeten të rrezikshme për gratë që vizitojnë Dubain,” thotë Stirling.

Australia, rrëfimi i një udhëtareje: ‘Nuk do kthehem kurrë më’

Emma Lovell, një australiane që ka udhëtuar në 76 vende, thotë se gjatë një ndalese dyditore në Dubai u ndje e kërcënuar nga meshkuj të “frikshëm” në vendet turistike. “Ishte gjithçka artificiale, pa shpirt e pa kulturë të vërtetë,” thotë ajo. “Nuk ndjeva asgjë autentike.”

Paralajmërimi i fundit: mos e besoni fasadën e sigurisë

Radha Stirling këshillon të gjithë vizitorët të njohin ligjet strikte të Emirateve, përfshirë kodin e veshjes, sjelljen në publik dhe konsumimin e alkoolit.

“Mos e merrni të mirëqenë që Dubai është i sigurt vetëm sepse e reklamojnë kështu. Pas kësaj fasade luksi fshihet një sistem ligjor që nuk i mbron gratë – madje mund t’i ndëshkojë ato për raportimin e abuzimeve,” përfundon ajo.

Këshilla praktike:

• Shkarkoni aplikacionin emergjent “Detained in Dubai”.
• Nëse arrestoheni, keni të drejtën të heshtni, të kërkoni përfaqësim ligjor dhe të kontaktoni ambasadën tuaj.