Një përplasje e fortë ka ndodhur mes prezantueseve të emisionit “The View”, pasi Sunny Hostin doli kundër bombardimeve parandaluese të Izraelit ndaj Iranit, duke i cilësuar ato si të paligjshme dhe në kundërshtim me të drejtën ndërkombëtare. Argumenti i saj u përball me kundërshtime të forta nga bashkë-prezantueset Alyssa Farah Griffin, Sara Haines dhe Joy Behar, të cilat theksuan se Irani është sponsori kryesor shtetëror i terrorizmit dhe se nuk respekton asnjë normë ndërkombëtare.

Në kulmin e debatit, Hostin theksoi se ndërhyrja duhet të bëhet diplomatikisht dhe se nuk mund të justifikohet bombardimi i një shteti, pavarësisht rrezikut. Por Haines e kundërshtoi duke thënë se Irani financon grupe terroriste si Hamas dhe Hezbollah dhe se “ka qenë gjithmonë jashtë çdo rregulli”. Edhe Griffin kujtoi sulmet iraniane me raketa ndaj forcave amerikane në Irak. Për të shmangur keqkuptime, Hostin sqaroi më pas: “Unë po kritikoj qeverinë e Benjamin Netanyahut, jo popullin hebre – kjo nuk është antisemitizëm”.