Një adoleshent britanik ka marrë një dënim të pezulluar me 18 muaj burg pasi pranoi fajin për një sulm të egër ndaj një roje sigurie në një klub nate në Magaluf, Spanjë. Ngjarja ndodhi në orët e para të 31 korrikut 2019, kur Max Barnes, atëherë 19 vjeç, goditi me shishe në fytyrë një punonjës sigurie nga Lituania, duke i shkaktuar një plagë të thellë që kërkoi mbi 20 qepje – ndonëse raportet lokale flasin për 50.
Pamjet filmike tregojnë momentet para dhe pas incidentit, ku roja, i veshur me një bluzë të bardhë, shihet duke e përzënë Barnes nga lokali “The Plaza” për sjellje të pahijshme. Pasi u qëllua me shishe, ai reagoi duke goditur britanikun me grushta, duke e lënë përtokë mes një turme të alarmuar. Gjykata mori parasysh pranimin e fajit dhe kompensimin prej 35 mijë paundësh të paguar ndaj viktimës, duke lejuar që Barnes të qëndrojë i lirë me kusht që të mos shkelë ligjin sërish.
Ngjarja riktheu vëmendjen tek dhuna mes të rinjve britanikë në zonat turistike spanjolle, ku autoritetet kanë shprehur shqetësim për sjelljet e dhunshme gjatë pushimeve. Prokuroria refuzoi pretendimet e Barnes për vetëmbrojtje, duke theksuar se nuk kishte prova për ndonjë sulm paraprak ndaj tij. Ky rast vjen disa muaj pas një tjetër incidenti të ngjashëm në Magaluf, ku një ushtare britanike shmangu burgun pas një sulmi me gotë ndaj mikeshës së saj, që përfundoi në terapi intensive.
Autoritetet spanjolle vijojnë të ndjekin me serioz raste të tilla dhune, pavarësisht nëse viktimat tërhiqen nga paditë. Në të dyja rastet, marrëveshjet me drejtësinë dhe pranimi i fajit u shoqëruan me dënime të lehtësuara, duke shmangur burgimin.
