Një shpërthim i fuqishëm ndodhi në bazën “Starbase” të SpaceX në Texas mbrëmjen e së mërkurës, kur raketa Starship 36 u përfshi nga një top gjigant zjarri gjatë një prove të zakonshme statike. Pamjet tronditëse tregojnë momentin kur hunda e raketës shpërthen papritur, duke ndriçuar ekranin dhe pastaj duke u shndërruar në një re të zezë tymi që mbuloi qiellin e natës.

Testi statik — që kryhet pa lëshim të raketës, ndërsa ajo qëndron e fiksuar në tokë — përfundoi në një “anomali të madhe”, sipas njoftimit zyrtar të SpaceX. Kompania konfirmoi se askush nuk u lëndua dhe se zona përreth u mbajt e sigurt. “Ekipi ynë po punon ngushtësisht me autoritetet lokale për të garantuar sigurinë e vendit të testimit dhe komuniteteve përreth,” thuhet në deklaratë.

Megjithatë, banorë të zonës raportuan se shpërthimi tronditi dritaret dhe mobiliet e shtëpive të tyre. Autoritetet në qytetin Port Isabel njoftuan për “një anomali të mjetit hapësinor” dhe u kërkuan qytetarëve të raportojnë çdo dëmtim.

Ky incident vjen vetëm pak javë pasi një tjetër version i raketës gjigante 403-këmbëshe shpërtheu mbi Oqeanin Indian gjatë një fluturimi provë për satelitët Starlink. Një tjetër test statik i Starship 35 muajin e kaluar përfundoi po ashtu me flakë, kur një objekt fluturoi nga kanali i flakës poshtë platformës.

Me dy fluturime të dështuara dhe disa prova të dështuara këtë vit, shpërthimi i së mërkurës përbën një tjetër pengesë në ëndrrën e Elon Musk për kolonizimin e Marsit. Por SpaceX mbetet i përkushtuar ndaj testimit të shpejtë dhe iterimit: “Testet zhvillimore janë të paparashikueshme, por nga çdo provë mësojmë. Kjo na ndihmon të rrisim besueshmërinë e Starship.”

Musk tha se ritmi i lëshimeve do të përshpejtohet: “Rreth një lëshim çdo 3 deri në 4 javë.” Megjithë sfidat, SpaceX nuk heq dorë nga objektivi për të bërë jetën njerëzore ndërplanetare.