Tensionet mes Iranit dhe Izraelit janë përshkallëzuar sërish, teksa autoritetet iraniane raportojnë për arrestimin e disa personave të dyshuar për spiunazh dhe bashkëpunim me agjencinë izraelite të inteligjencës, Mossad.
Sipas agjencisë shtetërore të lajmeve Tasnim, një shtetas i huaj është ndaluar në qytetin portual të Bushehrit ndërsa filmonte një zonë të ndjeshme bërthamore. Ai akuzohet për bashkëpunim të drejtpërdrejtë me shërbimet izraelite dhe për grumbullim informacioni të klasifikuar.
Në një tjetër zhvillim të rëndë, në qarkun Baharestan, në periferi të Teheranit, autoritetet iraniane thonë se kanë zbuluar një “ekip terrorist” të lidhur me Mossad. Brenda një automjeti u gjetën mikro-dronë, eksplozivë, si dhe pajisje komunikimi dhe sistem synimi – të cilat, sipas guvernatorit të përkohshëm Morad Moradi, do të përdoreshin për sulme vetëvrasëse në zona të dendura me popullsi me synim krijimin e panikut dhe destabilizimin e sigurisë së brendshme.
Mediat iraniane shtojnë gjithashtu se katër persona të tjerë janë arrestuar në qytetin e Isfahanit, të cilët dyshohet se vepronin si “mercenarë” të Mossad-it dhe po përgatisnin akte sabotimi.
Këto arrestime vijnë në një kohë të tensionuar për rajonin, pas raportimeve për një sërë sulmesh të sofistikuara izraelite brenda territorit iranian, që kanë përfshirë qendra ushtarake dhe bërthamore. Autoritetet iraniane nuk kanë dhënë ende detaje të plota mbi identitetin e të arrestuarve apo mbi fazën e hetimeve.
