Pamje të reja të publikuara sot nga ushtria ukrainase zbulojnë dëmin masiv të shkaktuar nga një operacion sekret i dronëve që goditi thelbin e forcave ajrore ruse. Sulmi spektakolar, i quajtur “Operacioni Rrjeta e Merimangës” dhe i mbikëqyrur personalisht nga presidenti Volodymyr Zelensky, është vlerësuar si një nga sukseset më të mëdha të Ukrainës që nga nisja e luftës.
Sipas shërbimit sekret ukrainas SBU, sulmi i koordinuar përmes qindra dronëve FPV (me pamje të parë), u realizua pasi këto armë moderne u kontrabanduan fshehurazi në Rusi, të fshehura në kontenierë druri që imitonin shtëpi modulare, të transportuara nga shoferë rusë të painformuar. Kamionët u vendosën pranë bazave ajrore strategjike, dhe më pas u hapën me telekomandë duke lëshuar dronë që sulmuan avionët në tokë.
Pamjet filmike tregojnë shpërthime dhe zjarre në katër baza ushtarake: Olenya në Murmansk, Dyagilevo në perëndim të Rusisë, Ivanovo në verilindje të Moskës dhe Podmoskovye në periferi të kryeqytetit.
Sipas SBU-së, operacioni ka nxjerrë jashtë loje rreth 34% të avionëve bombardues me rreze të gjatë veprimi të Rusisë, përfshirë Tu-95 dhe Tu-22, që shpesh janë përdorur për të lëshuar raketa drejt Ukrainës. Gjithashtu janë goditur edhe Tu-160 (bombardues bërthamor), An-12 (transportues) dhe Il-78 (cisternë për karburant).
Pamje satelitore nga baza ajrore Belaya konfirmojnë dëme të rënda në të paktën tre Tu-95. Në total, Ukraina pretendon se 41 avionë janë dëmtuar ose shkatërruar, me një vlerë të përgjithshme prej rreth 1.5 miliardë paundësh. Disa avionë janë shkatërruar plotësisht, ndërsa të tjerë kërkojnë muaj të tërë riparimesh. Disa dronë besohet se përdorën inteligjencë artificiale për të ndjekur rrugë të paracaktuara.
Kjo ndodhi pikërisht ndërsa presidenti rus Vladimir Putin u shfaq për herë të parë publikisht pas sulmeve, në një videokonferencë me zyrtarë të lartë të sigurisë. Zyrtarët e tij raportuan edhe për dy aksidente trenash të shkaktuara nga sabotatorë ukrainas që hodhën në erë ura hekurudhore.
Në epiqendër të skandalit është edhe ish-DJ rus Artem Timofeev, i cili akuzohet si agjent i Ukrainës dhe zotërues i njërit prej kamionëve nga ku u lëshuan dronët. Një urdhër arresti ndërkombëtar është lëshuar për të dhe gruan e tij, Ekaterina Timofeeva, që kanë humbur gjurmët. Çifti, dikur mbështetës të Revolucionit Euromaidan në Ukrainë, kishin jetuar më vonë në Rusi ku ai themeloi një kompani transporti në fund të vitit 2024.
Sipas burimeve të SBU-së, autorët kryesorë të sulmit tashmë janë larguar nga territori rus.
Në një fjalim drejtuar ministrave të mbrojtjes në Bruksel, Zelensky theksoi se Rusia duhet të detyrohet të pranojë diplomacinë përmes presionit ushtarak: “Nuk duhet ta lejojmë Moskën të mjegullojë realitetin. Ajo duhet të shtyhet drejt paqes.”
Ndërkohë, ministri gjerman i Mbrojtjes Boris Pistorius deklaroi sot se “suksesi ushtarak rus në këtë luftë nuk është i afërt dhe as i pritshëm”.
Operacioni i Ukrainës ka goditur jo vetëm fuqinë ajrore të Rusisë, por edhe krenarinë e Kremlinit—duke e vendosur Putinin përballë një krize të re strategjike dhe politike.
