Një tjetër përballje mes aktivistëve ndërkombëtarë dhe forcave izraelite po merr formë në ujërat e Mesdheut. Anija “Madleen”, me në bord aktivisten suedeze Greta Thunberg dhe 11 aktivistë të tjerë pro-palestinezë, ka nisur një udhëtim të rrezikshëm drejt Gazës me qëllimin për të thyer bllokadën izraelite dhe për të dorëzuar ndihma simbolike për popullsinë civile që po përballet me një krizë humanitare shkatërrimtare.
Anija u nis më 1 qershor nga porti i Catanias në Itali dhe pritet të mbërrijë në ujërat pranë Gazës brenda 7 ditësh – nëse nuk ndalohet. Në bord ndodhen furnizime të kufizuara si miell, formula për foshnje, pajisje mjekësore, dhe produkte higjienike – ndihmë që simbolizon më shumë një akt proteste sesa zgjidhje praktike për popullsinë prej mbi 2 milionë banorësh në Gaza.
Izraeli paralajmëron: “Jemi të përgatitur”
Ushtria izraelite ka reaguar me paralajmërime të ashpra, duke theksuar se do të ndërhyjë për të ndaluar anijen, ashtu si në përpjekjet e mëparshme të lëvizjes “Freedom Flotilla Coalition”. “Edhe për këtë rast, ne jemi të përgatitur. Kemi fituar përvojë ndër vite dhe do të veprojmë sipas nevojës”, deklaroi zëdhënësi i IDF, gjeneral brigade Effie Defrin.
Pikërisht kjo “përvojë” u përmend si referencë për incidentin tragjik të vitit 2010, kur trupat izraelite sulmuan një flotilë të ngjashme duke vrarë nëntë aktivistë në bord – një ngjarje që shkaktoi tronditje ndërkombëtare.
Thirrja e Thunberg: “Të mos heshtim para gjenocidit”
Në një fjalim të mbajtur para nisjes, Greta Thunberg shpërtheu në lot, duke theksuar: “Ne po e bëjmë këtë sepse në momentin kur ndalojmë së përpjekuri, humbasim njerëzillëkun tonë. Asnjë rrezik nuk krahasohet me rrezikun e heshtjes përballë një gjenocidi të transmetuar në kohë reale.”
Thirrja e saj vjen ndërkohë që Izraeli vazhdon ofensivën e përgjakshme në Gaza, e cila sipas të dhënave nga Ministria e Shëndetësisë e drejtuar nga Hamas, ka shkaktuar mbi 52,000 viktima, shumica gra dhe fëmijë. Izraeli mohon akuzat për gjenocid, duke e quajtur këtë një shpifje antisemitike dhe thekson se operacionet e tij janë të drejtuara ndaj Hamasit, jo ndaj popullatës civile.
Drone dhe tension në det të hapur
Aktivistët kanë raportuar praninë e një droni mbi anijen, që ngriti frikën për një ndërhyrje të menjëhershme. Më pas u konfirmua se bëhej fjalë për një dron të Rojës Bregdetare greke që po kryente monitorime. Megjithatë, tensioni mbetet i lartë, pasi një tjetër anije e kësaj lëvizjeje u godit muajin e kaluar në ujërat ndërkombëtare pranë Maltës, për të cilën grupi fajësoi Izraelin.
Mbështetje dhe presion ndërkombëtar
Anija “Madleen” ka fituar mbështetjen e disa eurodeputetëve, përfshirë Rima Hassan, e cila ndodhet në bord por është shpallur person non grata nga Izraeli për qëndrimet e saj kundër ofensivës në Gaza. Grupi i majtë në Parlamentin Europian ka kërkuar nga Bashkimi Europian të sigurojë mbrojtjen e aktivistëve, ndërsa Komisioneri i Lartë i OKB për të Drejtat e Njeriut ka paralajmëruar Izraelin që të “përmbahet nga përdorimi i forcës”.
Një betejë për vetëdijen
Flotilja e Greta Thunberg është pjesë e një strategjie më të gjerë ndërkombëtare për të tërhequr vëmendjen ndaj krizës humanitare në Gaza. Përveç lëvizjes në det, organizatorët planifikojnë edhe një marshim ndërkombëtar drejt Rafahut nga ana e Egjiptit në mesin e qershorit.
Mes shpresës dhe frikës, “Madleen” lundron drejt një bregu të bllokuar nga lufta, ndërsa e gjithë bota mban frymën për të parë se cili do të jetë veprimi i radhës i shtetit të Izraelit. A do të lejojë një akt simbolik humanitar të mbërrijë në tokë të rrethuar nga uria – apo do të japë një tjetër shembull të asaj që Thunberg e quan “krim i heshtur i botës”?
