Banorët përgjatë kanalit piktoresk të Little Venice në Londër kanë nisur një betejë kundër sjelljes antisociale të vizitorëve që marrin me qira varka për festa, pasi disa prej tyre janë kapur duke kryer akte seksuale në publik, duke urinuar dhe defekuar në kopshtet e njerëzve dhe madje duke u zhveshur përpara fëmijëve.
Frika e komunitetit është rritur pasi kompania e njohur e varkave GoBoat UK ka aplikuar për një licencë për shitjen e alkoolit duke ngjallur kujtime të kohës kur kjo kompani e kishte tashmë një të tillë dhe pati si pasojë një valë incidentesh të turpshme dhe sjelljesh të rrezikshme.
Sipas banorëve, shoferë të dehur përplasnin varkat, bërtisnin, shanin dhe disa përdornin edhe drogë. Tani kompania kërkon të nisë një shërbim të ri të quajtur GoBoat Luxe, i cili do të lejonte konsumimin e kufizuar të alkoolit në prani të një drejtuesi profesionist varke.
GoBoat këmbëngul se kjo nuk është një kthim tek “pijet e pakontrolluara”, por një alternativë “e kontrolluar dhe me cilësi të lartë”. Varkat me qira për vetë-drejtim do të vazhdojnë të jenë rreptësisht pa alkool.
Megjithatë, aplikimi për licencën ka shkaktuar një valë kundërshtimesh – përfshirë edhe nga Shërbimi i Shëndetit Mjedisor, i cili paralajmëron se kjo licencë do të rrisë “shqetësimet publike dhe mund të ndikojë në sigurinë e qytetarëve».
GoBoat gjithashtu ka kërkuar të kthejë një kontejner të vogël në Merchant Square, Paddington, në një kiosk për shitjen e pijeve alkoolike. Kjo pavarësisht se faqja aktualisht menaxhon 16 varka me qira dhe një varkë të ngushtë që nuk do të përdoret për shitje.
Aplikimi është dorëzuar në shkurt, për të lejuar shitjen e alkoolit çdo ditë nga ora 09:00 deri në 22:00 por brenda pak javësh ka marrë kundërshtime të ashpra nga banorët që sjellin në vëmendje precedentët shqetësues të përdoruesve të mëparshëm.
Një banor theksoi se GoBoat më parë kishte probleme me konsumimin e pakontrolluar të alkoolit: «Sjellje të pahijshme, zhveshje në publik, urinim përgjatë shtegut, kërcënime me dhunë ndaj pronarëve të varkave dhe më shumë.”
Një tjetër shkroi: “Absolutisht e kundërshtoj herën e fundit që GoBoat lejoi alkool, më urinuan në anën e varkës, përplaseshin me varkat e tjera dhe bërtisnin nëpër tunele. Jo, kurrsesi. Zoti mos e dhëntë.”
Një tjetër pronar i varkës u shpreh: “Shumë herë më kanë urinuar në varkë, kanë përdorur drogë dhe janë zhveshur para të gjithëve. Muzika e lartë, bërtitjet dhe këngët nga GoBoat krijonin një zhurmë të padurueshme për të gjithë ne.”
Një person tjetër raportoi 40 incidente sjelljeje kaotike dhe të pasigurtë, përfshirë urinim publik në kopshte dhe zhveshje përpara fëmijëve. Sipas tij, në vend që të jepet licenca, “duhen kontrolle më të rrepta dhe ndëshkime për të ruajtur mirëqenien publike”.
Një tjetër pronar varke tregoi se si klientët e dehur të GoBoat kapeshin pas varkës së tij dhe e shqetësonin rëndë: “Muzikë e lartë, ulërima, drogë, njerëz që bien në ujë, përplasje, zhveshje, urinim në kopshtin tim.”
Një banor tjetër tha se ka parë vetë njerëz duke ndjekur dhe vrarë kafshë të egra dhe duke kërkuar të urinojnë apo defekojnë nëpër kopshte në hyrje të tunelit të Maida-s.
“Nuk kuptoj si mund të shqyrtohet ky aplikim të shesësh alkool për njerëz që do të drejtojnë një mjet lundrues pa asnjë trajnim në një nga segmentet më të ngarkuara të kanalit të Londrës”, shtoi ai.
Megjithatë, në mesin e qindra kundërshtimeve, vetëm një letër mbështetjeje është dërguar: “Uji duhet të tërheqë të gjithë. Diversiteti është i rëndësishëm. Një shishe në një udhëtim të ngadaltë në kanal është thjesht e përsosur.”
Grant Sweeney, bashkëthemelues i GoBoat London, u shpreh:
“GoBoat Luxe është një koncept krejt i ndryshëm. Varkat do të drejtohen nga persona të certifikuar, të cilët do të jenë esëll. Konsumi i alkoolit do të jetë i kufizuar, do të ketë kontrolle çantash, patrullime dhe mbikëqyrje nga një ‘ranger boat’. Ne kemi marrë miratimin nga Canal & River Trust, çka tregon besimin në qasjen tonë profesionale.”
