Kryeministri Edi Rama publikoi këtë të hënë një video promovuese për rrugën e re në Ksamil, një nga destinacionet më të frekuentuara turistike në jug të Shqipërisë. Me pamje ajrore të realizuara me dron, kreu i qeverisë vlerësoi investimin si pjesë të përpjekjeve për të përmirësuar infrastrukturën turistike dhe për t’i dhënë zonës një standard më të lartë pritjeje për pushuesit.
Por, ndërsa rruga duket moderne nga lart, po nga lart duhet parë edhe një tjetër realitet: deti, simboli i Ksamilit, nuk shihet më nga toka. Ndërtimet pa kriter, shpeshherë të paligjshme dhe jashtë çdo plani urbanistik, kanë zënë bregun dhe horizontin. Vila, lokale dhe struktura të improvizuara kanë mbuluar çdo hapësirë të lirë, duke bërë që të vetmet pamje panoramike të mbetura të detit të jenë ato të filmimeve me dron – ironikisht, të një droni që vetë Rama e përdor për të promovuar investimin.
Ksamili është një nga rastet më flagrante ku bukuria natyrore po mbytet nga ndërtimi i pakontrolluar dhe mungesa e zbatimit të ligjit. Në vend që të jetë një perlë e mbrojtur, ai po kthehet gjithnjë e më shumë në një shembull të shkatërrimit urban që mbulohet me propagandë vizuale. Rruga e re është e mirëpritur, por nuk mund të fshehë faktin se ajo të çon në një kaos ndërtimor ku deti është i dukshëm vetëm nga qielli.
