Një tjetër viktimë në sagën gjakmarrëse mes dy familjeve në veri të vendit. Pjetër Kaza, 57 vjeç, është ekzekutuar me breshëri automatiku mëngjesin e sotëm, sapo kishte mbërritur në banesën e tij pas turnit të natës në minierën e Spaçit, në zonën e Munellës.

Policia ka sekuestruar në vendin e ngjarjes 12 gëzhoja, ndërsa nga hetimet paraprake rezulton se autori ishte fshehur në shkurret anës rrugës dhe e qëlloi viktimën teksa po hapte derën e shtëpisë. Pasi kreu vrasjen, autori u largua në këmbë në drejtim të një vendi ku dyshohet se e priste një mjet motorik, duke i mundësuar arratisjen e menjëhershme nga zona.

Ngjarja ndodhi në orët e para të mëngjesit dhe nuk ka dëshmitarë, ndërsa mungesa e kamerave të sigurisë e ka bërë edhe më të vështirë identifikimin e autorit.

Pistë kryesore: hakmarrja që vijon prej vitit 1994

Pista kryesore ku po përqendrohen hetimet është ajo e gjakmarrjes, një konflikt që zanafillën e ka që në vitin 1994, kur Ndue Kaza, ish-shef i krimeve në Rrëshen, u vra në mes të qytetit. Autorët e dyshuar të asaj ngjarjeje, vëllezërit Dod dhe Augustin Gjini, u ekzekutuan më pas nga Martin Kaza në vitin 1997 në Laç, për çka ky i fundit u dënua me 22 vite burg.

Saga e hakmarrjes nuk ndaloi as pas kësaj. Më 28 prill 2024, në një lokal në Bruksel, u vra Agustin Kaza, vëllai i viktimës së sotme, i qëlluar me armë zjarri në kokë dhe kraharor. Tani, me vrasjen e Pjetër Kazës, kjo përplasje ka marrë jetën e tre anëtarëve të familjes Kaza brenda tri dekadave.

Martin Kaza, autori i ekzekutimit në vitin 1997, aktualisht ndodhet në burg, pas arrestimit dhe ekstradimit nga Londra në vitin 2017.

Policia ka ngritur pika kontrolli dhe po kreh zonën për të gjetur ndonjë gjurmë që mund të çojë në identifikimin e autorit të atentatit të sotëm.