Një ngjarje tronditëse ka ndodhur pasditen e së dielës në qendrën tregtare Fairgreen në qytetin Carlow të Irlandës, ku një burrë i armatosur ka hapur zjarr në ambientet e brendshme, duke shkaktuar panik mes qytetarëve.
Sipas Policisë Irlandeze (Gardaí), burri – një shtetas i bardhë irlandez – është gjetur i vdekur në vendin e ngjarjes dhe besohet se plagët që i morën jetën janë vetë-shkaktuar. Trupi i tij ndodhet ende në vendngjarje dhe nuk do të lëvizet derisa të shpallet zona tërësisht e sigurt.
Një vajzë 9-vjeçare ka marrë lëndime të lehta dhe është trajtuar nga ndihma e shpejtë në vend, pa pasur nevojë për shtrim në spital. Ende nuk është përcaktuar me saktësi se si ajo është lënduar gjatë incidentit.
Sipas raportimeve lokale, burri ka qëlluar disa herë me armë brenda supermarketit Tesco, duke shkaktuar frikë dhe kaos të madh. Pamjet nga vendngjarja tregojnë njerëz që largohen të trembur, ndërsa qendra tregtare dhe parkingu janë evakuuar plotësisht dhe janë rrethuar nga forca të shumta policore, zjarrfikës dhe autoambulanca.
Në vendngjarje ndodhet edhe njësia speciale për çmontimin e mjeteve shpërthyese të ushtrisë, që ka sjellë një robot për të siguruar zonën.
Ministri i Drejtësisë së Irlandës, Jim O’Callaghan, e ka cilësuar ngjarjen si “të tmerrshme” dhe ka theksuar se dhuna me armë është jashtëzakonisht e rrallë në Irlandë. Ndërsa zëvendëskryeministri Simon Harris ka shprehur shqetësimin e thellë dhe solidaritetin për vajzën e vogël dhe familjen e saj.
“Askush nuk pret që diçka e tillë të ndodhë në një ditë pushimi në një vend të populluar me qytetarë dhe fëmijë. Është tronditëse për të gjithë,” tha një nga këshilltarët lokalë, Fergal Browne, i cili falënderoi forcat e emergjencës për ndërhyrjen e shpejtë.
Gardaí kanë kërkuar që të gjithë qytetarët që mund të kenë regjistruar pamje të ngjarjes të mos i shpërndajnë në rrjete sociale, por t’ia dorëzojnë autoriteteve për hetime të mëtejshme.
Hetimet vazhdojnë dhe zona do të mbetet e rrethuar gjatë gjithë natës derisa të garantohet siguria e plotë.
