Një ngjarje tronditëse ka ndodhur mbrëmjen e së enjtes në Denton të Manchesterit, ku një foshnjë 1-vjeçare ka mbetur me plagë serioze dhe jetëndryshuese në fytyrë, pasi u sulmua nga qeni i familjes brenda banesës. Sulmi ndodhi para syve të nënës së re, e cila ka bërtitur në panik teksa shihte vajzën e saj të mitur të shqyehej nga kafsha.

Policia e Greater Manchester konfirmoi se në vendngjarje u dërguan forca të armatosura dhe ekipe të specializuara për trajtimin e qenve të rrezikshëm. Qeni është eutanazuar në mënyrë humane në vendngjarje, pasi u nxor nga banesa nën shoqërimin e oficerëve të trajnuar.

Sipas dëshmitarëve, nëna 21-vjeçare dhe gjyshi i vajzës, 53 vjeç, u panë të mbuluar me gjak në rrugë pas incidentit. Të tre, përfshirë foshnjën, u transportuan në spital, ku mjekët thanë se plagët e të rriturve janë të rënda, por jo kërcënuese për jetën. Vajza e vogël u dërgua me urgjencë me helikopter drejt Manchester Royal Infirmary dhe ndodhet ende në gjendje kritike.

Ngjarja ka tronditur banorët e lagjes Baslow Road, të cilët panë skenat dramatike nga dritaret dhe rruga. “Dëgjova ulërima të një gruaje, ishte e tmerrshme. Pastaj pati zhurmë, bërtitje dhe pastaj policia e tërhoqi qenin jashtë,” tha një banore.

Policia nuk ka kryer arrestime lidhur me këtë rast, ndërsa po vijon hetimet për të zbardhur rrethanat e plota. Hetuesit po kërkojnë çdo informacion të mundshëm nga banorët e zonës, duke i bërë thirrje atyre që mund të kenë pamje nga kamerat e sigurisë, celularët apo kamerat e makinave.

“Ky ishte një sulm i tmerrshëm që ka lënë një vajzë të vogël me dëmtime të rënda e të përhershme. Familja është e shkatërruar nga ajo që ndodhi,” deklaroi drejtuesi i hetimeve, Detektiv Superintendent Gareth Jenkins.

Lagjja është rikthyer në normalitet, por familja e foshnjës vijon të jetë nën mbikëqyrje dhe mbështetje nga autoritetet, teksa komuniteti shprehet i tronditur nga kjo tragjedi që ndodhi në zemër të një lagjeje të qetë.