Një nënë që shiti vajzën e saj 6-vjeçare për vetëm 800 paund tek një “shërues” është dënuar me burgim të përjetshëm në Afrikën e Jugut.

Racquel “Kelly” Smith, 35 vjeç, u shpall fajtore për rrëmbim dhe trafikim së bashku me të dashurin e saj Jacquen Appollis dhe mikun e tyre Steveno van Rhyn.

Vajza e vogël Joshlin Smith, me lëkurë të çelët dhe sy blu të gjelbër, u zhduk në shkurtin e kaluar pranë shtëpisë së saj në Saldanha Bay, afër Cape Town-it – dhe që prej atëherë nuk është parë më.

Gjatë gjyqit gjashtë-javor, gjykata dëgjoi se një “shërues tradicional” e kishte kërkuar Joshlin për shkak të pamjes së saj fizike, dhe nëna thuhet se mori vetëm 800 paund për të.

“Për akuzën e trafikimit të qenieve njerëzore, dënohesh me burgim të përjetshëm. Për rrëmbimin, me 10 vite burg,” tha gjykatësi Nathan Erasmus. Ai theksoi se nuk bënte dallim mes të pandehurve në këtë krim të ftohtë dhe të lig, dhe asnjëri prej tyre nuk shfaqi emocione kur u lexuan dënimet.

Ky rast ka tronditur opinionin publik në Afrikën e Jugut prej muajsh, ndërsa Joshlin mbetet e zhdukur pavarësisht një operacioni të madh kërkimi.

Gjyshja e Joshlin, që tashmë kujdeset për fëmijën tjetër të vajzës së saj, iu lut Smith-it para shpalljes së vendimit: “Kthema [mbesën] ose më thuaj ku është.”

Amanda Smith-Daniels më pas i tha televizionit Newzroom Afrika: “Asnjë dënim që ata marrin nuk do ta kthejë mbesën time.” Ajo e përshkroi familjen si të “shkatërruar” dhe e dënoi vajzën e saj për përpjekjet për të fajësuar të tjerët, kur në fakt “ajo e bëri aktin”.

“Në ç’mënyrë e gjen gjumin dhe e vazhdon jetën?” e pyeti ajo në deklaratën e viktimës, pas publikimit të një raporti nga një punonjës social, i cili tregonte se Joshlin kishte jetuar në kushte të rënda neglizhimi.

Smith dhe bashkëpunëtorët e saj refuzuan të dëshmonin ose të thërrisnin dëshmitarë në mbrojtjen e tyre, ndërsa më shumë se 30 persona dëshmuan për jetën e vështirë të Joshlin dhe zhdukjen e saj.

Lourentia Lombaard, mike dhe fqinja e Smith, dëshmoi në qendrën komunitare që u përdor si sallë gjyqi për t’u dhënë mundësi banorëve të ndiqnin se Smith i kishte rrëfyer se kishte bërë “diçka budallaqe”.

Pak ditë para se Joshlin të zhdukej, ajo i kishte rrëfyer se e kishte shitur vajzën tek një “sangoma” – shërues tradicional. Lombaard më pas e pa Smith-in teksa mbushte një çantë të zezë me rrobat e Joshlin dhe e dorëzonte vajzën tek një grua, që besohet të ketë qenë sangoma, duke hipur në një makinë të bardhë dhe u larguan.

Njëra nga mësueset e Joshlin dëshmoi se gjatë një kërkimi për vajzën, Smith i kishte thënë se “ajo është tashmë në një anije, brenda një kontejneri, dhe po shkonin drejt Afrikës Perëndimore”.

Një pastor lokal dëshmoi se kishte dëgjuar Smith-in të fliste për shitjen e fëmijëve të saj për 20,000 rand (rreth 827 paund). Thuhet se ajo do të pranohej edhe më pak – deri në 200 paund për Joshlin.

Punonjësja sociale që përgatiti raportin për gjykatën shkroi se nuk ishte “asnjë ekzagjerim të thuhej se Smith ishte truri i prapë këtij trafikimi”.

Ajo tregoi gjithashtu për historinë e varësisë së Smith nga droga që në moshën 15-vjeçare dhe se ishte ende përdoruese kur lindi Joshlin. U deshën pesë muaj që të regjistronte lindjen e vajzës.

Nëna e Smith e dëboi nga shtëpia për shkak të sjelljes abuzive pasi e kërcënoi të birin me thikë. Smith më vonë jetoi herë pas here në strehimore për gratë e abuzuara, por edhe aty abuzonte me fëmijët e saj kur ishte nën ndikimin e drogës.

Joshlin jetoi për një kohë me miq të familjes që u përpoqën ta adoptonin, por prindërit e saj e penguan këtë proces. Megjithatë, ajo arriti të kalonte fundjavë dhe pushime me familjen Andrews.

“Ne do të kujdeseshim për të më mirë se nëna e saj,” tha Natasha Andrews gjatë gjyqit.

Vetëm kur u lexuan deklaratat e viktimave dhe u shfaq një video e Joshlin duke qeshur në pushime me familjen Andrews, Smith shpërtheu në lot për herë të parë.

Babai i Joshlin, Jose Emke, gjithashtu u përfshi emocionalisht dhe duhej të nxirrej nga salla e gjyqit.

Andrews tha se kishte dashur të ndajë videon pasi “shumë njerëz… nuk e dinë as sesi tingëllon zëri i Joshlin”.

Nxënësja e heshtur dhe e rregullt u përshkrua nga mësuesja e saj, Edna Maart, si e dashur. Çdo ditë që nga zhdukja e saj, shokët e klasës e pyesin se ku është. Për t’u dhënë ndjesinë se ajo është pranë tyre, ata fillojnë ditën me këngën e saj të preferuar: “God Will Work It Out”. Kjo këngë u luajt edhe në sallën e gjyqit, ku të gjithë shpërthyen në lot.

Një grua e cila besohet të ketë qenë sangoma u arrestua vitin e kaluar me të pandehurit e tjerë, por akuzat ndaj saj u hodhën për mungesë provash.

Sangomat janë të njohur në Afrikën e Jugut me ligj, si praktikues të mjekësisë tradicionale që pretendojnë kontakt me shpirtra të paraardhësve.

Në mars, policia gjeti rroba fëmijësh pranë vendbanimit të Joshlin dhe i dërgoi për ekspertizë forenzike. Rrobat ishin të përgjakura dhe aty u gjet edhe një thikë. Nuk u dhanë më shumë detaje.

Komisioneri i Policisë së Provincës Western Cape, Thembisile Patekile, tha se mund të ketë arrestime të tjera, por autoritetet duhet të përqendrohen sërish në kërkimin për Joshlin.

“Në këtë fazë, nuk kemi një fëmijë. Qëllimi ynë përfundimtar është ta gjejmë fëmijën. Ende shpresojmë ta gjejmë të gjallë.”

Fëmija më i vogël i Smith tani jeton me babain e tij.

Vitin e kaluar, në Afrikën e Jugut u raportuan 632 fëmijë të zhdukur. Në dhjetë vitet e fundit, numri është afër 9,000, sipas raportimeve vendase.

Bianca van Aswegen, kriminologe dhe koordinatore kombëtare në Missing Children South Africa, i tha BBC-së se trafikimi i fëmijëve “është shumë më i madh se sa e tregojnë statistikat zyrtare, për shkak të rasteve të shumta që nuk raportohen”.

“Nuk kam parë ndonjë rast që të shpërthejë kaq shumë publikisht në Afrikën e Jugut më parë – as ndonjë kërkim kaq masiv për një fëmijë të zhdukur. Mendoj se rrjetet sociale luajtën një rol të madh dhe edhe partitë politike u përfshinë në këtë rast,” shtoi ajo.