Kancelari i ri gjerman, Friedrich Merz, ka ndezur spekulime të reja për dërgimin e raketave të shumëkërkuara Taurus në Ukrainë, pas deklaratave se aleatët perëndimorë kanë hequr kufizimet mbi përdorimin e armëve me rreze të gjatë që i kanë dhuruar Kievit.
Në një dalje të përbashkët me presidentin ukrainas Volodymyr Zelenskyy në Berlin, Merz nuk premtoi dërgimin e raketave Taurus, por deklaroi se Gjermania do ta ndihmojë Ukrainën të zhvillojë raketa me rreze të gjatë brenda territorit të saj. Ky pozicion përfaqëson një kthesë të mundshme nga qëndrimi më i rezervuar i paraardhësit të tij Olaf Scholz.
Raketat Taurus, me një rreze veprimi deri në 500 km dhe kapacitet të lartë shkatërrimi, janë parë nga Kievi si një armë që mund të ndryshojë rrjedhën e luftës. Deri më tani, Gjermania ka refuzuar t’i dorëzojë, nga frika e përfshirjes së drejtpërdrejtë në konflikt.
“Prej tanimë nuk ka më kufizime në rreze për armët e dërguara në Ukrainë – as nga britanikët, as nga francezët, as nga ne, dhe as nga amerikanët,” deklaroi Merz për televizionin publik gjerman WDR. Por më pas sqaroi se nuk po njoftonte një vendim të ri, por po përshkruante një realitet që ekziston prej muajsh.
Megjithatë, deklaratat e Merz kanë nxitur reagime të përziera në Berlin. Deputetë të SPD dhe edhe të partisë së vet CDU kritikuan retorikën kontradiktore, duke thënë se Gjermania mbetet e paqartë dhe e pavendosur në këtë çështje.
Rusia ka reaguar ashpër ndaj çdo sugjerimi se raketat perëndimore mund të përdoren për të goditur brenda territorit të saj, duke paralajmëruar për “konfrontim të mëtejshëm” dhe madje edhe për pasoja bërthamore. Zëdhënësi i Kremlinit, Dmitry Peskov, tha se Merz “ka ngatërruar të gjithë, në mos edhe vetveten”, ndërsa zëdhënësja e Ministrisë së Jashtme, Maria Zakharova, e akuzoi Berlinin për thellimin e mbështetjes ndaj “regjimit të Kievit”.
Ndërkohë, ekspertët paralajmërojnë se edhe nëse Berlini vendos të dërgojë Taurus, efekti do të jetë më shumë simbolik sesa vendimtar. Rusia, tashmë e përgatitur për betejë në një fushëbetejë transparente dhe të ndërlikuar teknologjikisht, ka mësuar të shmangë goditjet përmes shpërndarjes dhe kamuflimit.
Në çdo rast, lëvizjet e fundit të kancelarit Merz përforcojnë idenë se Gjermania mund të jetë gati për një rol më të guximshëm në përkrahje të Ukrainës – edhe nëse për momentin po e bën këtë përmes zhvillimit të kapaciteteve brenda vetë territorit ukrainas.
